Vawiin July 26, 2021 a Vairengte khawbula Mizoram leh Assam ramria kan Mizoram Police Pasaltha huaisen leh Assam Police inkahna thawm chuan karlovah 'Zoram Khawvel' a deng chhuak thuai a, Zo chhul chhuakte marphu a tirangin thisen a lum tir hle! Vairengte khaw daia Mizoram chhan nana Pasalthate silai puak ri chuan, khawvel hmun hrang hranga Zofate beng dar min khawn rik sakin, thinlung che vel min siam sak nasa hle !
Hmanlai kan Piputen an hmelma te lu an laksak hun lai ang maiin, 'ral lu engzat tak rawn hawn ang maw?' tih rilru te pawh min put tir thei rum rum mai dawn a lawm le! Hetianga ram leh hnam chhan duhna vanga thinlung che vel neihna hi, Saptawnga "Patriotic" an tih, mahni ram leh hnam hmangaihna atanga lo piang a ni. Thilmak a ni lo. Mizoram leh hnamin chhan a ngaih laia kut kuangkuahin, kan lo Uipui tuilian thlir liam mai mai emaw, hmuhnawm tia kan lo Circus thiltih thlir mai mai tawh a nih vaih chuan, Mizo hnam hmangaihna (nationalism spirit) kan tlachhamin nei tawhlo hle, tihna a ni thei ang.
Kum 100 Kristian Zofate hi, kan thurin Bible zirtirna leh kan Kristianna vangin huaisenna turah pawh dawih zawk anga kan tan leh awm tum a lo awm fo tawh thin a! Hman laia Mizo Pasaltha (Hero), mipuiin kan ngaihsan em em Taitesena, Vanapa, Khuangchera, Chawngbawla, Zampuimanga, etc te ang "Pasaltha" han ngaihsan tur dang kan nei ta vak lova. Tunah chuan kan ram hruaitu Politician te chuan kan khawtlang nun nasa takin an thununa an kaihhruai tawh avangin, Politician fing leh huaisen, zui tlak leh mipui ngaihsan (hero) tlak kan mamawh ta hle a ni. Tunlai thangtharten kawng hrang hrangin "Hero" tur kan dap vel ruai a, mahse, kan hmu mai si lo! Pasaltha huaisen, vantlang mipui ngaihsan rawn tur mi kan mamawh ta a ni.
He video clip tawite-ah hian silai kap ri tuar tuar karah, Mizo thalaite chuan fiamthute la thawhin an hmaa ral an beih, silai nena anmahni rawn kap ve tute pawh chuan an rawn kap fuhin, an kaphlum ang tih reng ngaihtuah lovin, Pasaltha ram chhuakten an hmaa Nghal rual leh Zawng rual rawn chhuak an lo kap ang lekin Assam Police te chu an ngai niin alang. Fiamthu te la thawhin, silai han kap ri tuar tuartute chu, "Ka hmangaih che! I ti tha lutuk" titein an han aukhum vel a! Ral hmaah an awm tih reng inhre lovin, an zamchhe map lo nia!
Mizo Pasaltha Khuangchera chu a huaisen khawp a, a Pa nen khuang siam tura thing an kih tum pawhin a hmaiah thing thlarten han deng mahse, na pawh ti duh lovin, a mit pawh a khap tha duh meuhlo te kha an ti a! Chutiang ang mai chuan mi pakhat, Tear Gas kahna vel vanga a lu/ bek-a pem lah chu, a nep thei ang berin " A pem hlek" an ti duh lek chauh mai si! Mi tlawmngai leh Pasaltha chu hahin, chauvin, na tuar mahse, chhel takin "A na lo ve", a ti a, midangte tana rilru hrehawmna tur leh hahna tur emaw ang chiin, tawngkam an chhakchhuak ngailo. Chutiang nun chu he video clip tawiteah pawh hmuha hriat theih turin a lo lang leh ta, ava ropui em!
Thenkhatin, "An tlanchhia em ni, Vaiho chu?" tia zawhna an siam lah chu ka Pi te chuan, meizial zu khu hlet hlet chungin zam eihlovin, "An awm reng ang. An che ngam teuh lo!" tiin, silai keng ve tho an ral beih chu a hlau lovin, engteh vakah a ngai thamlo tih hriat takin, dawihzep vanga leia bawk phek reng emaw, hlauh vanga biru turah a ngaihzia a han chhan chhuak zui a! Aw, ka Pi chu i sakhming hrelo che mah ila, ka va duh reuh tak che em. Silai puak ri thruai thruai karah pawh, zam hmel a pu lova, a mitmeng a danglam chhin eih lo!
Indona hmun leh silaimu leng vel kara mei i han zu khu hlet hlet erawh chu, Assam Police lam tan rawn kah fuh in awl phah ang tih erawh ka va hlauhpui lawi si che u em! Ka pi hi a hmel enin vanglai pel tawh, tha thrum tawh tih hriat ngawih ngawih mahse, Mizoram leh hnam chhan turin ral hmatawng (frontline)-ah a la hnatlang peih hi ka ngaisang tak meuh. Tluk loh rim a nam.
Hetianga Mizoram leh Assam ramri buaina laia kan Police duty hian puan lukhum ni lovin, thira siam lukhum (helmet) ang chi khum tur nei sela, silaimu leng vel leh lung tuma han invawm te, talhtuma invuak thut awm thei lakah a venghim thei dawn a, tun hnuah chuan thira siam helmet khum tawh sela, a va tha dawn em.
He video clip tawitea kan Mizo Pasalthate che tla vel hmuh leh an tawngkam hman hriat hian, Assam Police te chu thisenin an lo ngam biaih biaih hle tih a hriattheih. "Ka duh lutuk che. Ka hmangaih che... Khatiang khan ka kap ve chak alom!". Heng tawngkam atang hian an hmaa hmelma awmte chu sipai silai kah zir ang lek angah ngaiin, chand kap emaw an inti duh lek fang niin alang?! Kan Police te hi a hunah chuan, ram leh hnam chhan nan an lo huaisenin, an dawihzep hauhlo a nih hi. He khawvelah hian Pathian tan nun kan hlanlo rau rau a nih chuan, ram leh hnam tana nun hlan chu a ropuiin, a zahawm em em a ni. Dawihzep chu zir hranpa a ngai lova, huaisen chu zir ngai zawk a ni. Mizo tangval, eih ka leih seih!!
- CT Lalrinawma
Post a Comment