Football a ram ropui pahnih Italy leh Spain te hi Euro 2012 ang khan final ah han intawng leh se duhthusam a nih laia, a tu emaw zawk zawk in final thleng lova puanthuah an tel mai tur hi chu a uihawm dawn kher mai. Referee tur Felix Brych hi eizawnna ah chuan Lawyer, Law ah doctorate degree nei ngat a ni a, mahse a hming bulah Doctor erawh a dah ve lem lo a ni!.
Italy hian q/final ah World No.1 Belgium 2-1 a hnehin a vawi 5na atan s/final a lut a, match 32 ah hneh loh an nei lohna a ni. Belgium laka hnehna an chang hi Italy tan a lawmawm viau laiin, an player pawimawh leh Euro 2020 a khel tha ber a chhal ngam hial left back Leonardo Spinazzola (Roma) inhliam erawh chu team tan channa nasa tak a ni.
*Henry Delaunay Cup* vawi khat 1968 chawi tawh Italy leh vawi thum 1964, 2008, 2012 chawi tawh Spain te hi football thiam ram tih takah an iner dunin, an inkhel pawh khaw khat a Club pahnih inhal tak inkhel derby ang maiin _Mediterranean derby_ an vuah a. An intawn hmasakna ber 1920 Summer Olympic ah Spain 2-0 in a chak a, a intawn hnu hnun ber 2008 WC qualifying 2.9.2017 ah Spain 3-0 in a chak. Vawi 37 an inkhelh tawh ah vawi 11 ve ve an chak a, vawi 15 chak zawk awm lovin an inhneh a ni.
Euro ah vawi 6 inkhel tawhin vawi 2 ve ve chakin, vawi 2 an in draw a ni. Player an nei tha dunin, tournament boruak sa lo hmachhawn thang tawh an ni a. Zan in ah pawh inkhel ropui leh hmuh nawm an pho chhuak ngeiin a beisei awm a ni.
Spain hi football khelh dan hmingthang tak _tiki-taka_ style in, short pass a, ball in pe zung zungin an khel thin a. Chuvang te pawh chu a ni ang, an khelh a piangin an ball possession pawh a sang thei hle. Midfielder ropui Xavi leh Inniesta ten ho thei tawh lo mahse, an Captain Sergio Busquest te Koke leh Barcelona a a khelh pui tleirawl kum 18 a upa Conzalez Pedri ten midfield an luah lum hle a. Busquest hi che muang tak angin a lang na a, a mit a fingin ball a sem dik a, Spain midfield a thunun hneh hle a ni.
Raul, David Villa leh Fernando Torres te hnuah Spain hian world class striker an nei leh ta meuh lova, mahse chu chuan goal thun lamah harsatna a siam hran lo. Euro 2020 ah hian an player 6 in goal 12 an thun tawh a, goal thun tam a Euro record (player 8) pawh an hnaih hle a ni.
La Liga a Atletico Madrid champion puitu Alvaro Morata hi an ram mipuiin an chhaih khawloh vang nge beisei a pha lovin, season liam ta a La liga a goal 23 thun tu Villarreal striker Gerrard Moreno hi a rintlak mah zawk in a lang a ni. Man-City striker Ferran Torres 21 leh kum 23 a upa Daniel Olmo, RB Leipzig te tawn hriat la nei tam lutuk lo mah se, Spain Coach Luis Enrigue hian senior player aiin a thlang tlat thin a ni.
Italy in kum 3 zet hnehtu an tawn lohna chhan chu an defence leh midfield
that vang a ni awm e.
Defensive game khel thang tih takah an defence pawh a phui thain, tawn hriat ngah kum 2014 WC a Luis Suarez an a seh Juventus defender Georgio Chiellini (36) leh Leonardo Bonucci (34) te hi senior lam ni tawh mahse, Club khat a khel tih takah an inman dunin Gibraltar lungpui ang maia nghet leh sut huphurhawm an ni a. Mahse, an left back Spinazzola khel thei lo tur hi chu an tuar deuh mai thei a ni. Spinazzola hian a pawlte tan chance vawi 8 siam sakin, cross ball vawi 11 zet a nei a, goal shoot vawi 7 lai a nei bawk a ni. A hmunah hian Chelsea left back Emerson Palmeiri dos Santos a luh a rinawm a ni.
Midfield ah pawh Chelsea midfielder Jorginho leh Marco Verratti, PSG te, Serie A champion Inter Milan midfielder kum 24 mi Nicola Barella te chuan an uap hneh hle a. An ball control a tha in, an passing a fingin a dik a, chu chu an that pui hle a ni. Forward hovin ball tha an hmuh theih nan chuan midfield atanga ball chhuak a pawimawh thin avangin Busquest & co leh Jorginho & co ten mual laia ding chang zawk nih in chuhin _midfield war_ a thleng dawn a, a pui khawp ang, eng indona mah a nep tak tak ngai lo a ni.
Italian hmatawngah hian Italy tan a match 50 a goal 15 thuntu thuntu Ciro Imobilee leh Napoli striker chhuanvawr Lorenzo Insigne te dinhmun a nghet in, kum 23 a upa Juventus striker Federico Chiesa pawh a in sawhnghet ve mek a ni.
Semi final atang chuan a hmunah mi 60,000 in an en thei tawh dawn a, inkhelh pawh a nuam khawp ang. Chak zawk tur sawi lawk a harsa in, chutih laiin inkhelh hmuhnawm tak min hlui dawn tih erawh chu zawl chhe te nei ve lo tan pawh huai takin a sawi lawk theih awm e !?
- biakthansanga khiangte
Post a Comment