"IF THEY COME AGAIN, WE SHALL KILL THEM ALL, OK"
( An lo kal nawn leh a nih chuan, kan that fai vek tur a ni, OK)
-K. Vanlalvena, MP (RS)
Vawiin July 28, 2021 chu Lungleia ka thian pakhatin WhatsApp-ah *video clip* tawite min rawn thawn a, a hnuaiah chuan, *"Pu Vena, MP (RS) Parliament kawta interview hi a Pa khawp mai"*, tiin a ziak tel kher bawk a. Coffee in pahin ka han en thuak a, mahse, a tawng chu a fiah tawklo deuhva. Ngun deuhva beng bula ka han ngaihthlak chuan, July 26-a Assam Police 200 aia tam ten Mizoram chhung an rawn luh thu leh, firing order pe hmasatu leh Mizo mipui lam hawia silai an hmeh puah thu a sawina niin, chutianga Mizoram leilung an rawn rap hmasaa an che leh a nih chuan, lo thah vek mai tur, a tihna tawngkam a lo ni a! A tawngkam chhuak chu Mizo hnam veitu leh hmangaihtu dik tak tawngkam ni a ka hriat avangin leh, a tawng chhum bulin, a tawng rumin, a tawng pa (man) hlein ka hria a, chu video clip tawite chu vawi 5 zet ennawnin, ka ngaithla zui ta nghe2 a ni!
Pu K. Vanlalvena chu tunhma leh tunah tunge a nih ka lo hre ngai lova. MNF party atanga Rajya Sabha MP atana vawrh chhuah a nih thu leh, amah chu Mizo Pa tak mai a nih thute ka hre zui a, Mizoram leh hnam chhan nana a tawngkam chhuak chu ka lawm kher mai! *Vawi 5 lai ka en apiangin a tawngkam, "If they come again, we shall kill them all, OK" a tih mawlh mai chu ka lawmin, ka nuih pui leh thin*. India ram khawpui ber New Delhi-a Parliament kawtah *Zee News TV Reporter*-ten interview an neihna niawm a ni. Hetiang reng renga Mizoram atanga Parliament Member thlan chhuahte zinga ram leh hnam chhanna tura tawngkam rum chhakchhuak hi, tun hmain ka lo la hre ngai lova, ka lawm zual a ni ber awm e! Tunhma chuan "MP ngawi reng" tih tawngkamte chu kan tleirawl laiin, politician thenkhat ten an lo sawi thin ka hre tawh a, ani Pu K. Vena chu "MP ngawi reng ni lovin, MP duh rumra" a nih dawn hi le? tiin ka ngaihtuah zui reuh reuhva.
Tun tum July 26-a kan thenawm Assam State Police te chet dan chu a uchuak deuhvin, dan mit atang pawhin an che diklo (fall) hle niin alang. "An cho va, an cho chhuak a. An rim a, an rim thlu ta a ni", tih tawngkam ang deuhvin, Mizote chalah chil an rawm hnawm hmasak zawk takah chuan leh, an ram chhung nilo rawn daiin, an rawn pawngtal a. Mizote min rawn chapchar luih takah si chuan, duhlovin hreh hle mah ila, loh theihlohvin Thalfang thlah lo thei lovin kan Police Pasalthate an rawn nawr chep ta si. Chakai kaw tawpa tang cheh hlawk chu a na ve duh viau tho thin asin!
*Discovery Channel* leh *YouTube Channel* velah ramsa leh rannung lian leh chaka kawlhrawng zawkten an aia chaklo zawkte bu lum zawla awm an run a, an lo chhanlet leh beih dan kan en thin chuan, tharumin hneh dawnlo mahse, thih ngamin anmahni rawn beitute chu theihpaling kawhin, an thapui leh huaisenna neih zawng2 nen an lo beilet ve thin a ni. Assamese mipuite aiin Mizote chu tlem hle mah ila, kan ram leh hnam chhan nan na na nachuan, theihpatawpin a siruk laa kan lo do let a, kan beihlet chu a thiang a ni.
*Pu K.Vena an tih tawngkam tawite chu, India ram mihring tluklehdingawn 1.3 vel zingah mi nuai tam takin an lo thlir ve ngei ang a, engtin ngai ve tak ang maw?!*
"If they come again, we shall kill them all, Ok" tih lai chu ka la fuh zual a! Ka rilruah kum 1968 daih tawha Enzo G. Casbellani film siam, *"Kill Them All And Come Back Alone"* (Italy) tih te, kum 2017 a Peter Malota film siam, "Kill' Em All" tih Jean-Claude Van Damme channa leh Rockband Metellica-ho studio album "Kill 'Em All" tihte chu a lo lut nghal zung mai mai bawk a!
Achangin hruaitu tan chuan, an hruai mipuite thlamuanpui tura tawngkam rorum deuhva chhakchhuahte a tul thin a ni. Ramhnuaiah Sakei rim lo nam thang huam mahse, hruaitu tha chuan amah zuitute hlau leh khura an awm dawn ai chuan, " *A hlauhawm loh ve, Keipui rim ni lovin Sanghar rim a ni e* " a tih ngaihchangte pawh a awm thin. Pu K. Vena hian Mizoram leh hnam chhan nana tibuaitute a vaukhanna " *An lo kal nawn leh a nih chuan, kan that vek tur a ni, OK*", a han ti piap piap mai chu, nu leh pa, thlamuantu nih a tlin dawn riauvin ka hriat chu maw le!
Mizoram ramri chungchang leh tun tuma buaina hi political party tarmit a tanga thlir chi a ni lova. Mizo Tarmit bun chunga party rilru dah thaa thlir a, *Kawi kawm thin ang thrap* a Mizote kan tanrual ngaih hun a ni. Kan pi leh puten lu chhum ban chhum huam leh, an thawk tawp leh thisen far tawp thlenga ram min lo humhalh sak, venhim zel chu keini thangtharte mawhphurhna a ni e. Mizoram lo chu, khawvelah ram dang kan neilo. Mizoram - Mizote ta.
Soviet Union ram 14 zeta a kehchhiat hma leh *Cold War* vanglaia Soviet Union-in a ruk tea America ram thenawm Cuba rama Nuclear ralthuam bunna tur a lo siam a, " *The Cuban Missile Crisis*" tih, nuclear bomb hmanga indona rapthlak tak a thlen tep lai khan, America ram chuan hruaitu thar tha President atan *John F. Kennedy* a nei a, President Kennedy chuan Oct 22, 1962 zan dar 7pm (EST)-ah American mipuite thlamuanna turin thuchah ropui leh Soviet Union chu a thiltih tawpsan nghal turin vauna dengkhawng tak a rawn sawi a:
*"... Zalenna man chu englai pawhin a sang em em a - chumi turin Americans te chuan englai pawhin aman sang tak an pe thin. Chumi turin kawng khat kan zawha kan thlan ngai loh tur kawng chu inpekna leh intukluhna a ni..."* (The cost of freedom is always high - and Americans have always paid for it. And one path we shall never choose, and that is the path of surrender and submission) a lo tihte chu min hriatchhuah tir uai uai mai nia maw le!
Tunlai khawvel, Age of Digital Revolution-ah chuan Technical War leh, *Media War* te an bei uar nasa tawh si a. Keini Mizote pawhin social media kaltlangin leh a tha zawnga hmangin, Mizoram leh hnam humhalh leh chhan zawngin thu eh hla i nei thin ang u.
-CT Lalrinawma
Post a Comment