Assam Police te chetna avangin lohtheih lovin tharum nen chhanlet a ngai ta a ni - Lalchamliana, Home Minister
Home Minister Pu Lalchamlianan nimin khan Assam Police-ten Mizoram ramria IR duty-na hnehchhuh an tumna hmun, Vairengte Autorickshaw stand bul a tlawh.
Home Minister Pu Lalchamliana chuan ramri buaina chu tharum tel lova chinfel tum mek laiin Assam Police-te chetna avangin lohtheih lova tharum nen chhanlet a ngaih phah ta a ni a ti a, Assam lam ah nunna hial chan an awm phah chu pawi a tih thu a sawi a. Assam Police rawn luh tumna hmun thenkhat Saihapui ‘V’, Aitlang leh Zophaiahte chuan Mizoram Police a tul anga dah zel an nih thu leh Saihapui ’V’ khawtlang hruaituten nimina an lo thlen angin Police dah belh nghal a nih thu a sawi a. Ramri buaina chungchangah Vairengte khawtlang mipuite inpekna leh huaisenna chu fakawm a tih thu a sawi bawk a ni.
Supply Minister Pu K.Lalrinliana pawhin Assam nen a ramri buaina avangin ei leh bar, LPG leh POL-a harsatna a awm loh nan ruahmanna hrang hrang a awm thu a sawi a, Mizoram Sawrkar Godown-ah mipui thla hnih ei daih awm mek tur a ngaih a nih thu a tarlang bawk a ni.
Ramri a ralmuan theih nana CRPF dah ten, Mizoram lo lut a IR Camp luahlan tum Assam Police-te an dang lo ni a sawi chungchang chu CRPF IG Pu Sarbjit Singh chu hma la tur a hrilh nghal a ni.
Home Minister leh a tawiawmtu Minister leh MLA-te hian ramri buaina chungchanga a tul apiang a hman turin Vairengte khawtlang hruaitute hnenah sumfai an hlan a, hemi rual hian Sports Minister Pu Robert Romawia Royte chuan silpaulin bundle khat a hlan nghal bawk a ni.
He hunah hian Food, Civil Supplies and Consumer Affairs Minister Pu K.Lalrinliana, School Education Minister Pu Lalchhandama Ralte, Rural Development Minister Pu Lalruatkima, Sports Minister Pu Robert Romawia Royte, MLA 3- Pu Lalrinsanga Ralte, Pu H.Lalzirliana leh Pu C.Lalmuanpui te bakah IGP Pu John Neihlaia leh Police Department-a hotu dangte an tel bawk a ni.
Post a Comment