July.28.2021 : Premier League tan a ni tep tawh, season tharah hian dan thar hman tur a awm nual dawn.
Bamford-a goal offside an hamsak atang khan VAR offside en dan khan sawisel a hlawh nasa em em, tunah chuan dan thar a piang ta nge nge a ni.
Professional Game Match Officials Limited referees’ chief Mike Riley-a hovin June thla khan rorel a ni a, VAR offside line chu chhah zawka rin ni tawh se an ti a. Ke zungpui lo offside ang kha VAR hman a nih hnuin a awm teuh a, kha kha a fair tawk loh avangin VAR line chu chhah deuh zawka rin tura tih a ni ta a, a chhah zawng tur erawh thutlukna a la awm rih lo.
Tin, VAR hmanga offside leh handball vel an check lai mipui hmuh theiha phochhuah loh an rel bawk a, VAR pawh hi mihring tho an nih avangin an line rin dan leh angle hrang hrang atanga an thlir dan te chu thil thlen laia mipui hmuha phochhuah tawh loh an rel a ni.
Offside chungchangah chuan Bamforda goal offside avanga an pawm tak loh kha he dan ti danglamtu a ni kan ti lo thei lo a. Midang pawh ban/kut offside pharsak pawh an tam hle tho. Dar/zakhnuai chu offside line rinna tur a ni tawh dawn a. Kut lo pawng hret a awm a nih pawhin ham a ni tawh lo ang. A awmzia ni ta ber chu, handball an hamna thin kut/ban chin zawng lo pawng pawh nise offside a ni tawh lo anga, handball theih lohna taksa bung dang chu offside tehna a ni tawh dawn a ni.
Goal a lut ta a, a ti goal-tu te lam zing ami kutah a goal hmain ball-in a per hlauh mai. Khang kha VAR hmanga ennawn a ni leh ngei dawn a, mahse tihpalh thil thua a kuta ball a lo tawk a nih chuan handball hamsak a ni tawh dawn lo a ni. Chutih laiin handball hmanga direct-a a goal a nih erawh chuan ham a ni thung ang.
Post a Comment