ENGLAND VS DENMARK
Wembley Stadium, London
July 7.2021 dar 12:30 Am
Referee : Danny Makkelie, Netherland hi professional football referee a nih rualin, Police Inspector a ni bawk a ni.
Group D winners England chuan Q/final ah Ukraine 4-0 a hnehin, kum 25 hnuah a vawi 3na atan S/final a lut a, S/final erawh a la pel lo. World Champion ni chungin Euro 1968 ah Yugoslavia an hneh lova, Euro ’96 ah Germany lakah an chak lo bawk.
Euro ’96-a top scorer England Captain Allan Shearer, Southgate nena khel ho chuan England chuan match tinah hma an sawn zel thu a thu a sawi a, a sawi sual lo mai thei. Euro 2016 ah R/16 thlenga Germany in goal an chhuah lo chu khumin, Q/final thlengin goal an la veng him a ni.
World No.10 Denmark hi group match tir lamah an tal buaiin, Finland leh Belgium laka an tlawm hnuah Russia lakah point 3 pet chhuakin KO stage an lut a, R/16 ah Wales goal 4 faia a hnehin Q/final an lut a. Q/final ah, Euro a an intawn hnuhnun ber 2004 Q/final-a 3-0 an chak loh phuba lain Czech Rep 2-1 a hnehin a vawi 4na atan S/final an lut a ni.
World No.4 England leh Denmark te vawi 22 an inhmachhawn tawh ah England vawi 12 chakin Denmark vawi 4 an chak a, chak zawk awm lovin vawi 6 an in hneh thung a. England khelin hma an sawn bak ah, an inpui home ground a khel tur an ni a. Position tinah an tha tlangin, mahni pawh an inring tawk hlawm a. Entu tam ber chu England player 12na an nih dawn avangin, Denmark hi chak lo tur zawk, _underdog_ ah an dah deuh vek a.
Mahse, game hi chu sawi lawk a harin, Wembley Stadium ah ngei hian Euro ’84 qualifying ah entu 82,000 hmaah Allan Simonsen penalty hmangin Denmark lakah 1-0 in an lo tlawm tawh a, Uefa Nations League 14.Oct.2020, nikum mai ah Christian Eriksen penalty hmangin 1-0 bawkin an tlawm leh a ni. An inpui ngei Wembley Stadium-ah Denmark lak ah vawi 2 tlawm tawhin, vawi 5 erawh an chak thung a ni.
England leh Denmark te an game kal phung a in ang lovin, England hi Italy ang em chuan defensive game uar lo mahse, khelh puite nawr rup rup ai chuan zawi dam dap a mahni in veng tak chung a attack chi an ni a. Czech Rep leh Germany an khelh te khan goal shoot vawi 5 ve ve chiah an nei. An ball bawh a nat lutuk loh avangin hian match 5 an khelh tawh ah goal shoot 37 an nei a, chung zinga 16 chuan an target fuhin, goal 8 an tilut tawh a ni.
Denmark thung hi chu physical taka attacking game khel chi an ni a, tharum an ngahiin an ball bawh pawh a na a, goal shoot pawh an nei tam thei hle. Match 5 an khelh tawh ah goal shoot vawi 86 zet neiin, chung zinga 31 chuan an target a fuh a. An khelh a piangin goal shoot vawi 10 aia tlem lo an nei ziah a ni. Khelh phung in ang lo tak innuai tur hi sawi nep pawh tum ila, Himalaya tlang a Ice Cream fakmawi ang lekin, kan thu leh hla in mi bengkhawn a hlawh loh hmel hle a ni!
England defence Harry Maguire (Man-Utd), Kylie Walker (Man City), John Stones (Man-City), Luke Show (Man-Utd) Kieran Trippier (Atletico Madrid) te an rintlakin, season tluan a Club pakhat a khel ho ang maiin an in man a. Match 5 an khelh tawh ah goal an la chhuah loh danah an defence phui that zia a hriat theih. Midfield ah Kalvin Philips (Leeds) te, Declan Rice (West Ham) te an che tha dunin, an dinhmun pawh a chian viau laiin, tawnhriat ngah Jordan Henderson te, kum 18 mi Jude Bellingham (Dortmund) te, ball thiam leh chak Mason Mount (Chelsea) zingah lut hmasa tur a chiang mai lo a ni.
A hmatawngah goal 3 ve ve thun tawh Captain Harry Kane (Tottenham) leh Sterling (Man-City) te chuh buai phak lohin an dinhmun a chiang a, anni bak ah hian dribbling tha Bukayo Saka (Arsenal) te, mipui atchilh Jack Grealish (Aston Villa), pa tawrtha Dominic Calvert Lewin (Everton) te, ball thiam Jadon Sancho (Dortmund/Man-Utd) leh Marcus Rasford (Man-Utd) te Southgate hian a enchhin vek tawh a, tu ber hian nge 1st eleven chang ang tih zanin ah kan hmu ang chu.
Denmark keeper Kasper Schmeichel chuan a pa hnung zuia Henry Delaunay Cup chawi ngei a tum hle, 1992 a Denmark an champion tum a an keeper Peter Schmeichel chu Kaspera pa a ni. Defence ah Captain tawnhriat ngah Simon Kjaer (AC Milan) te, Andreas Christiansen (Chelsea) te, Jannik Vestergaard (Southampton) leh Jens Stryger Larsen (Udinesse) te thlak tu nih inthlahrun awm khawpin an che tha a.
Midfied ah lah Tottenham midfielder Pierre Emile Hojbjerg (Tottenham) te Thomas Delaney (Dortmund) te Joakim Maehle (Atalanta) te, an inman tlangin, an passing a tha. Maehle hi goal ah a nghalin goal shoot vawi 10 ah goal 2 a thun tawh a, England defender te ven ngen ber tur pawh a nih hmel a ni.
A hmatawng ah Barcelona striker chak Martin Braithwaite te, Mikkel Damsgaard (Sampdoria) bakah Nice striker che rang leh tuan tha goal 3 thun tawh Kasper Dolberg hi hliam dam kawr Yussup Poulsen (Leipzig) ai chuan an luh hmasak hmel zawk mah a ni.
England in Euro ‘96 an dawl khan nomawi chawi ngei tumin slogan ah Football Came Home an hmang a, mahse an beisei a thleng lo. Euro 2020 ah hian England khelh laiin Football Came Home tiin an au hulh hulh thin a. Au hlawhtling thei tak ang maw??
- biakthansanga khiangte
Post a Comment