Lai Autonomous District Council chuan kum 2015-2021 inkara sorkar hnalak, sorkar kum bithliah pel tawh an awm leh awm loh chungchang chhuichiang turin Study Committee on Appointment of Staffs under LADC a din.
He committee hi thla 6 chhung atan din a ni a, thla 3 chhungin report kimchang Executive Committee, LADC ah thehlut tura tih a ni.
LADC in hemi chungchanga July, 5, 2021 a notification a tihchhuahah, he thutlukna hi Lai Student’s Association, Lawngtlaiin ziaka an thlen ang a bawhzui a nih thu a in ziak a. LSA chuan hemi chungchang hi ziaka thlen engmah a awm lova, kum 2015-2021 inkara sorkar hnalak chhui turin ngenna kan siam lo an ti. LSA chuan tun sorkara kum over tawh sorkar hnalak chu an duh loh ber leh hemi chungchang hi chingfel tura LADC sorkar ngen an nih thu an sawi bawk.
Hemi chungchangah hian he Committee-a an Chairman Pu H. Lalmuansanga, MDC chuan LSA hian tun sorkar thara hnalak chauh chhui turin min beisei a, ngun taka kan ngaihtuah hnuin rualkhai taka hma kan lak theih nan kum 2015-2021 inkara hnalakte pawh chhui turin ruahmanna kan siam ta a ni a ti a. Pu H. Lalmuansanga chuan hetiang mi, LADC hnuaia hnathawk an awm a, chhuichhuah an neih chuan an hna atanga ban an nih tur thu a sawi bawk.
Study Committee on Appointment of Staffs under LADC hian naktukah meeting pawimawh an nei ang.
Post a Comment