Assam-Mizoram Ramri-in India ram A Nghawr - Barak Democratic Front (BDF) ten darkar 12 chhung Barak Valley Bandh dawn

Lawngtlai 28.July,2021 : Niminpiaha Mizoram leh Assam ramria thil thleng chuan Parliament pawh a nghawr pha a, Assam atanga Congress MP, Ripun Bora chuan an dan 176 angin sawihona tawi (short duration discussion) neihna tur a thehlut a, Assam atang Congress MP Gaurav Gogoi chuan Lok Sabhaah sawihona turin notice a thehlut bawk.

            Congress hruaitu Rahul Gandhi chuan tweet-ah Union Home Minister Amit Shah beiin, ram rorelnaah a hlawhchham a ni a ti a. Mipui hnenah inrinhlelhna (distrust) leh inhuatna chi tuhna rah hlauhawm tak a lo lang chhuak a ni a ti.
            Home Ministry chuan state ramri buai chu a buai state-te thawhpuina chauha chinfel theih a ni a, sawrkar laipui chu inhriatthiamtawnna thinlung pua inremna muanawm ramri chinfelna hmuhna tura a puitu (facilitator) chauh a ni tih hi sawrkar laipui dinna reng a ni a ti.
            Home Ministry chuan state tam takah ramri buai a awm tih a pawm (confirms) a, Parliament-ah Home Ministry chuan ramri thua inhnialna/ram inchuh (dispute), ramri rin (demarcation) chungchangah thu inchuh (claims and counter claims) heng Haryana leh Himachal Pradesh, Ladakh UT leh Himachal Pradesh, Maharashtra leh Karnataka, Assam leh Arunachal Pradesh, Assam leh Nagaland, Assam leh Meghalaya leh Assam leh Mizoram inkarahte hian a awm a ni a ti.

   Assam leh Mizoram inkar ramri buainaah thu chhuah (statement) a siam dawn em tia zawhna chu Ministry of Home Affairs chuan Mizoram leh Assam ramria thil awm dan chu hnai tak (closely)ah a thlir thu sawiin, Mizoram leh Assam sawrkar biakpawh reng a ni a ti a. Tunah chuan dinhmun control- na hnuaiah a awm niin a lang a. Tun dinhmunah thil awm dan a la chichawm (fluid) a. Thil awm dan azirin House-ah thutlukna la siam a ni ang, a ti.
            Hetih lai hian phai lam media-ten an report danin, Kabuganj leh Dholai area-a mipuite thinrim chuan Kabuganj Bazar-ah kawng tiam chin awm lovin nimin zing lam dar 9:00 atangin an dang (blockade) a, Mizorama lirthei kal reng reng an dang vek a ni a ti.
            Barak Democratic Front (BDF) pawhin vawiin hian darkar 12 chhung Barak Valley Bandh an ko a, hei hi Assam Police panga leh Civil mi pakhat thah an ni duh loh lantirna a ni tih BDF Chief Convenor Pradip Dutta Roy chuan a sawi.