Lawngtlai 10.06.2021 : Vawiin lamah ruah a sur deuh reng a. Lawngtlai khawpui chhungah leimin hlauhawm sawi tur a awm lem lo niin a hriat a, mipui pawn chhuak pawh kan tam lutuk lo. Hri laka him tlan kan duh a, chumi tur chuan sorkar thupek kan zawm hram hram hi India khua leh tui kan nihna anga kan tih tur pawimawh tak a ni. Vawiin lama Lawngtlai District leh hmun thenkhat a thil thlen thenkhat te lo tarlan leh ila.
1. Vawiin tlai dar 5:00 thleng khan District hrang hranga Covid-19 vei enkawlna hmun atangin mi 150 an chhuak a. Aizawl District -66, Lawngtlai District-55, Kolasib District- 13, Lunglei District-9, Siaha District-4 leh Saitual District-3 te an ni.
2. Tukin 10.06.2021 RAgT positive tarlan zinga Siaha District ami positive tarlan khan RAgT negative, positive anga Siaha Distirct lam atanga report rawn buatsaihtute’n an tih tel palh anih avangin active case leh total case atangin paih a ni a. Active case hi 3431 an awm tihna a ni.
3. Vawiin khan vanduaithlak takin Mizoram-ah Covid-19 avanga nunna chan pathum kan neih belh leh a, chungte chu :
i) Hav.Lalramliana (52), Tuithian, Aizawl, PTS Staff chu dar 3:00 pm khan ZMC-ah a boral a. May ni 20 khan hri a kai tih hriatchhuah niin May ni 21-ah ZMC-ah admit a ni a. Amah hi natna benvawn nei sa a ni.
ii) Malsawmdawngliani (25), Mualkhang Nazareth Veng chu Covid-19 vangin tukin zing dar 5:00 Am khan ZMC-ah a boral a. June ni 5 khan hri a kai tih hmuhchhuah a ni a. Amah hi natna benvawn nei sa a ni.
iii) Remruatdiki (15), Hlimen chu tlai dar 2:50 khan ZMC-ah a boral a. Tukin zing kar khan hri a kai tih hriatchhuah niin ZMC-ah admit nghal a ni a. Hri a kai tih hriatchhuah anih hma hian natna khrih tak vei sa anih avangin damdawi in dangah enkawl a ni a. Covid-19 a kai tih hriatchhuah anih veleh ZMC ah dah luh nghal a ni.
4. Vawiin khan Chief Minister’s Relief Fund (CMRF) hman dan tur ngaihtuahtu Committee on Utilization of Chief Minister’s Relief Fund for COVID-19 chu an Chairman Pu Lalnunmawia Chuaungo, Chief Secretary hovin Chief Secretary’s Conference Hall, MINECO-ah an thukhawm a. Mizoram hmun hrang hranga De-addiction Centre leh Childcare Institution-te puihna tur Rs. 23,39,500 pek an remti.
5. Vawiin khan Darnamtlang khawtlang hruaitute chuan an Bialtu MDC Pu Lalhmachhuana’n buhfai a pek chu khawsak harsa zual thlanchhuah te hnenah an sem.
6. Lairam Christian Medical Centre & Hospital, Lawngtlai chuan RAgT test an kalpui thei ta a. Damlo enkawl ngai te leh anmahni awmpuitute chu test an paltlang ngei ngei tur ani, an ti a. RAgT test man hi Rs 350/- a ni a. Thawhtanni atanga Inrinni Dar 11:00 Am to 3:00 Pm thleng test hi an kalpui thin dawn a ni.
7. Vawiin khan Lai Students Association Gen.Hqrs, Lawngtlai te chuan tuichhak tlangdung a, Myanmar raltlan te tanpuina an sem.
8. Karlui-I ah Covid-19 positive hmuhbelh zel an nih avangin vawiin atang khan Active search Case kalpui tan a ni a. Vawiin khan medical team ten sample 305 an endik atangin Covid-19 positive 65 an hmuhchhuak tih report kan dawng. Active search case hi naktuk hian chhunzawm leh a ni ang.
9. Vawiin khan Chawngte PHC ah Covid-19 sample endik hna kalpui chhunzawm leh a ni a. Covid-19 positive 16 hmuhbelh leh an ni.
10. Zanin dar 6:30 khan Pu Lalchhanhima, Lawngtlai AOC chu Liapha lui ah a chesual in a boral a. A ruang hi dar 10:30 vel khan hmuh a ni
Post a Comment