GREEN MIZORAM DAY-2021 PUALA PU TJ LALNUNTLUANGA, HON'BLE MINISTER, EF & CC DEPARTMENT THUCHHUAH
Thupui : Tuihna leh boruak tha siam nan thing I phun ang u
A hmasa berin chhiartu zawng zawngte Green Mizoram Day,2021 chibai ka buk a che u.
Kum 1998-ah khan, Aizawl leh a chhehvela ramngaw chereu chak lutuk veng turin 'Green Mizoram Day' programme siamin Mizoram pumah hman zui a lo ni tawh thin a. Nikum,2020-ah erawh chuan Covid-19 hrileng avangin Green Mizoram Day chu mumal taka hman theih a ni lova. Kuminah pawh hrilengin ziaawm lam a pan loh avangin mipui pungkhawm lo zawnga hman a lo tul leh ta a ni.
Ramngaw kan tih chereu nasat avanga sik leh sa danglam leh, harsatna kan tawrhte hre reng chungin kumin, 2021 Green Mizoram Day theme atan "Tuihna leh boruak tha siam nan thing I phun ang u" tih chu State Level Sub-committee On Green Mizoram chuana thlang a ni.
Kan hriat angin, Kum 2019 atang khan khawvel hmun tinah chhiatna a thleng emaw tih tur a ni. Khawvel tana pawimawh em em, Amazon rain forest a Kang nasa hle a. Chumi hnuah Australia ram kang rapthlak tak a thleng zui leh nghal a. Ramngaw nasa taka a chereu hnu lawkah hripui a leng a; khawvelin tun thlengin ngai a la awh thei ta lo. Sik leh sa nasa takin a inthlak danglam mek a; to haw hunah to a haw thei ta lo va. Pi Pu chena kan sik leh sa hunbi chhiar thin dante pawh a lo danglam chho ta. Phat rual lohvin kan boruak, sik leh sa awm dan hi nasa takin a danglam a ni.
Mizoram pawhin Kuminah chuan Kum dang zawng aiin ruah kan dawng har a. Nasa takin ram kan tikang bawk. Kuminah phei chuan kan khawpui chawmtu lui liante pawh nasa takin an kam a ni tih kan hre chho ta zel mai. Kan lui liante bakah, kan tuikhurte pawh an kang tial tial a ni tih kan hriat kha. Heng kan harsatna tawhte hi ramngaw kan tihchereu nasat avang leh nungcha kan humhalh that tawk loh rah niin, khualrel kalphung inbuktawk pangngai a lo buai tak vang a ni.
Kan ramngaw neih mek te hi kan humhalh a, a chhe tawh kan siam that a,a chhunga thing leh mau, nungchate ti chereu lo tura kan venhim a tul a ni. Ramngaw kan tihchhiat a, kan tui lui leh tuihnate a kang chuan kan ram hian harsatna lian zawk kan la hmachhawn dawn. Nungcha-a kan hausakna te, kan boruak leh kan ramhmul hausaknate hi kan rohlu, khawvel mithmuha kan tam timawitu, kan nunna nen inkungkaih tlat ani tih I hre thar leh ang u
Kuminah hripui avangin thing phun hnatlang in pungkhawm thei lo mah ila, mahni remchan dan theuhvin, kan awmna hmun leh kan in bul hnai leh a chhehvel remchang apiangah, Tuihna leh boruak tha siam nan thing I phun theuh ang u
Ka lawm e.
TJ.Lalnuntluanga
Post a Comment