PM NARENDRA MODI-A "MAKE IN INDIA" A LO THLENG MEK ZEL E!
( Kan pu duhtak Narendra Modi thlalak a ni em aw?!)
Barack Obama chuan US politics-ah danglamna (change) siam tumin, a campaign auhla (slogan) ah pawh, "Aw, kan thei alom! (Yes, we can!) tih rawn hmangin mipui rilru hminin hneh takin US President term hnih (4+4=8yrs) a rawn nih phah a, mahse, nghet taka lo vawnsa leh awm tawh, Capitol Hill thunun US politic kalphung (principle) chu a tak takin a rawn tidanglam vak thei chuanglo.
"Change" tih tawngkam chu awlsam taka sawi mai theih ni mahse, ram rorelna kalphung tidanglam tak tak turin, mipui thinlungah danglamna (change) a awm a, a thlen hmasak phawt loh chuan "change" tih thumal chu a tak (reality) in a thleng mai theilo a ni. Mizo khawtlang nun, politics-ram rorelna fel tawklo leh Kohhranah thlengin siamthatna tura danglamna (constructive change) duhtu tam tak awmin, sawiin au au mahse, Mizo society-a hmel danglamna tlang lawn chhuaka danglamna (change) tak tak thlentir turin hun rei deuh zawk a la duh ang. Vawilehkhatah ram leh hnam tana "change" chu thleng thut thei a ni lo. Buhchium chhunga rannung awm chu, a hunbi kim hmaa nghakhlel taka lo kheuh hawn ve ngawt chi a ni lo. Buhchium chhunga Phengphehlep tial mawi tak lo chhuak tur chu, tha taka "change" awma a lo chhuah theih nan erawh, uluk taka enkawl ngai thung ang.Danglamna (change) hmuh chak luat vangte a lo sih pilh, vir pilh erawh a tha lo. Piansualna chauh a thlen sak ang.
India ram pum politics han thlir ila. Hindu moderate Congress party leh a sangawi zawnpui secular party ten kum rei tak chu India mipui tluklehdingawn 1.2 telte ro min rel sak a. Anmahni duhkhawplohna nasa tak awmin, Hindu nationalist Bharatiya Janata Party, Bajrang Dal, Vishwa Hindu Parisad, Shiv Sena leh an thawhpui dangte chuan India ram pumpui chu, " Hindunization, Saffronization" turin an rawn tlangau ve leh ta thung a, kum sangbi tam tak liam tawha Hindu sakhaw finnna, thiamna leh ngaihdan thil (philosophy, ideology) te chu uar takin, kum sangbi thar (new millennium) ah leh 21st Century - Globalization, Computer Age te chuan rawn vawrh nunga thar thawh lehin, Hinduism atchilh (fanatic) tam takte rilru khawihin, thinlung che vel an neih phah a ni. Hmakhawsanga an Pipute thuro chhiah leh thurin leh ngaihdan hmangin ram rorelna te chu, firfiak deuhva kalpui duhtu pawlte pawh an lo awm ta zel a! Hindutva atanga zu thlir sak chuan an demawm viau lem lo. Mahse,Computer Age daih tawha lung hriam hrei hman hun laia ngaihdan (Stone Age philosophy) niawm tak tak tih mai tur awm angte chu, kum zabi 21naah te pawh rawn hman (apply) an tum ta mai thin hi, a fuh viau lemlo a ni. Covid-19 hri leng dan nan Bawng ek leh Bawngpui zing zun a tha tih mai mai te hi, scientific proof awm manglo si lo, Hindu Puithiam thenkhat lahin an lo tuipui phian lawi si! India ram hi chu kan chhangchhe niai nuai hle.
Tun hnaia PM Narendra Modi thlalak, khabe hmul hmuar var vo tawh, zuah sei tak thlalak ka hmu chu, amah Narendra Modi ang ka tiin, Hindu Puithiam (Guru) ang ka ti bawk si! "Engtia awm thei nge, mihringah?" tih mai awl niin, Modi chuan Hindu Puithiam a lo nih tawh thin lai ang maiin nge ni ang a, Covid-19 hri len vang zawkin a khabe hmur chhur mai chu a lo zuah chiam ni ang aw? ti a ngaihtuah chungin a thlalak chu ka save hmak ta nghe nghe a ni.
PM Modi hi Gujarat state Chief Minister atanga India national level-a a rawn lar chhoh lai atangin, *a thu leh hla, tawngkam chhuak leh chezia hi ka lo ralkhat thlir ve zauh zauhva*, Hindu kulmukho rilru khawih zawng taka thusawi tha leh ngaihnawm fu fu a chhakchhuak thiam hle a ni. India ramah mirethei, ziak leh chhiar thiamlo, Hindu rumrut an tam hle a, chungho vote leh zirna leh thiamna vawrtawp nei Ph.D tihte leh *intellectual*-ho vote chu election-ah a intluk reng si avangin PM Modi tan chuan, chungho vote a hui thiam a, *vote bank*-ah a neih thiam a, a neih chhung chuan atan election-ah tlina hnehna (victory) chan hi harsa dawnin a langlo a ni. Mahse, a thiltih vel dan tam tak hi chu, kum zabi 21na tarmit bunna atang chuan thil fuh chiahlo, nuihza thlak a awm theiin alang thin a ni.
Lok Sabha Election hnu hnung berah khan hektu ka neih vang nge ni? Election dawna ka thuziak hnu lawkah Facebook-a *Mizo Special Report gr* atangin kar 2 chu thu post theilovin min lo khuahkirh sak tawh a! Mizoram atangin Hindu nationalist tantute nge ni ang a, National level atangin Facebook vela thuziak mite thuleh hla lo chik a, lo enkawl zuitu an indah a hriat loh a ni. US politic-ah pawh thil tenawm tak lo thleng tawhin, social media lar ber *Facebook* hmangtu tluklehdingawn zinga mi maktaduai 500 dawnte Data atanga an thu leh hla tarlan atanga mipui mizia an zir duh avangin, *Cambridge Analytical* chuan thil an lo chhuiin zirchiang daih mai hi a lo ni a! (hemi chungchang hi MSR-ah kimchang takin ka lo ziak tawh nghe nghe-CT). Lok Sabha Election dawna Facebook a thu post thei lova kar hnih zet min block te kha, vawiin thlengin a awmzia leh a chhan hi ka hre chak hle thin a ni.
*Lok Sabha Election* dawn lai, State thenkhatah vote an thlak nual tawh tiin Narendra Modi chuan thiam takin, Hindu Puithiamte leh Sakhaw la na miten an tlawh thin, Puk (cave) thuk ang reng tak pakhatah Hindu Puithiamho angin hun hmangin a han insawrbing ( *meditate*) a, chutianga Sakhaw thila meditation tih chu Hindu hote tan chuan ropui tak a ni ngei ang. Chu Puk chhunga a awm thlalak chu social media bakah media hrang hrangah a darh (viral) nasa hle a nih kha!
Hindutva atchilhtute tan chuan, "Kan pu ber chu, sakhaw ngaihsak mi, tawngtai mi" tiin, Kristian ni ta sela, " *Kan pu ber chu, Kristiante tantu, tawngtai mi, fianrial hun hmang mi, Biak Ina zing tawngtai hmang thin mi...*", etc tiin ha hipin kan sawi mai thei asin. PM Modi hian an chi pui, sakhaw thurin zawmpui ringtute rilru han dek a, hneh vel dan chu a lo thiam thlawt a nih hi!
Tun hnaia Hindu Puithiam ang mai a, a khabe hmul tuak varvo tawh, sei zeta a han zuah sei chhup mai te hi, *Hindutva* leh *Saffronization tarmit* atangin ka han thlirpui doh dohva, pa ropui leh dangdai, mi rilru hneh thiam thei tak chu a ni phawt mai!
*Modi gov't* hian Hindu moderate hote tih ngamloh leh tih hleihtheihloh, *Foreign Direct Investment (FDI)* a han welcome te hi fakawm ka lo ti a. *FDI te hi keini ang India ram theiah, kan welcome a, kan hman tangkai thiam loh chuan kawmchhakpa Chaia (China) te khi kan umpha ngai dawnin alang lo*. Mahse, term 2 chhunga a thiltih tam tak hi chu, mipuite tana phurrit leh tul vaklo thil, *Hindunization tana tangkai tur thil mai2 hi a tam deuh em aw ka ti a ni*.
Hmanniah ka Indian Passport ka renew tir a, hman kuma thil pawimawh lutuk an tih, Indian khualehtuite tan neih ngei ngei tura an tih, kan biometric la veka an siam *Aadhar Card* te chu an dah pawimawha chungnun tel lul nen, keini pawhin nei leh nei lovin, sum puk chawpin Cambodia atangin *Aadhar Card* siam turin mahni khuaah kan lo haw phah vang vang kha a ni a. Mahse, Passport dilnaah te chuan, ziak lan tul kherlo, tih zingah a lo awm leh ta mai mai si! Thil hi an tibuang bar khawlo zo teh e aw... ka ti.
Passport siam dan chu tlemin an lo tidanglam hlek a! A hluiah chuan Passport kawmah a chungah "Passport" tih inziakin, a hnuaiah "Republic of India" tih ziak a. Modi sorkar hnuah erawh Passport tharah chuan, a chung lamah "Republic of India" tih ziakin, a hnuaiah "Passport" tih chhuin, an thlak thleng thung a! Modi sorkarah Pawisa tam tak hlut zawng in ang reng chu a rawng (color) leh a lem ( size) an thlak danglam bawk a! Tin, amah Pu Narendra Modi pawh khabe hmul met fai ve deuh thin kha, Hindutva tuipui leh atchilhtute mit la tur takin, a lo zuah chhur bawk a! Hei hi em ni le, Pu Modia'n Digital India tihah "Make in India" min lo tiam chu le...? tiin, ka tuk thuan ei tur zinga Coffee dai duk phahin ka ngaihtuah zui vung vung mai!
-CT LALRINAWMA
Post a Comment