NEGATIVE VE THUNG ANG AW - Zoremi Hmar Zote

                                    

NEGATIVE VE THUNG ANG AW

Zoremi Hmar Zote

Kan hlauh ang ngei ngeiin, nikum lama ram dang chanchin kan lo ràl hriat ang kha, kan ramah ngei a lo thleng ve ta reng mai. Mak ka tih em em mai chu, nikum lam, hri a la rawn luh hmaa khati khawpa hlau a, tawmim a, thu awih si kha, a rawn lût ta chênga heti tak maia kan han inkài darh thei mai hi mak ka ti a ni.

A inkai darh theih dan te, inven dan leh him dan hre lo kan ni lo va. Health dept lama thawkte mai bakah, social media, visual media leh chanchinbu nen, nasa taka awareness kalpui niin, naupang kum nga mi lek pawhin an sawi zat zat thei ang tih khawpin zirtirna kan dawng tha a ni a. Mipui lam hian heti em em maia kan darhtir hi kan thiam loh a nih kan pawm ngam em aw! Kan fimkhur lo em em a, kan rin loh tak tak te leh keimahni ngei pawhin kan han kâi a, sawrkar mawhpuhna tur phêt kan zawng leh a, zahthlak hian! Kan hnung deuh khan pa pakhatin ZMC lama an enkawl dana a lungawi loh thu social media lamah a ziak a, an thawn darh chur chur a. Khatianga enkawlna tha a dawn avanga dama rawn chhuak luau na na na, a la vui dur dur mai kha chu ka lo îp deuh, ‘Delhi lamah te zu inenkawl se la, phâi lam te zu pan mai se la, damin a lo haw emaw chu’ ka lo ti rilru, ka sual reuh khawp mai.

 
Thu neitu ten chhuah an han khap a, lockdown te an han puang a. Thu kan awih em em anga a lan lai hian chhuah châka za tlat, chhuanlam fahrah te te siama chhuahna tur ngaihtuah tlat kan awm, kan awm lo pawh ti ula kan awm. Hri kài hi kan hlau tak tak lo a ni. Dawr kal theih hun an han siam a, chhungkaw pakhat atanga bazar pakhat awm theih ni se, midang hlata awm te, mask vuah that leh hand sanitizer hman that te i ngai pawimawh hram hram ang u tiin information mike atangin min au zui lawm lawm a. Chhungkaw khat atangin pakhat chauh kan chhuak lo reng reng. Chhuanlam fahrah te te siamin kan chhuak suau suau a, lo inhmu khât ta chu kan inbia a, kan nui ho va, inhnaih te tein thil kan lei tlâng suau suau a, kan hlau mawlh lo!

 
Kum upa lam, natna benvawn lo nei sa te, naupang lam thleng pawha ni tin mai mi han mal nghauh nghauh tawh hi chuan tih tak meuha tih a hun tawh vei nen, thenawm khawvenga la leng nulh nulh, chhungte ina la leng nulh nulh kan la awm ta cheu a, kan hlau mawlh lo! Eng anga kan thian tha pawh ni se, eng anga kan chhûng hnai pawh ni se, an vei thei vek a, min kài ve thei vek bawk. A nihna takah chuan keimahni chhungkaw member pawh hi, chhuak vâk kan awm a nih chuan inhlau tur kan ni, mi dang lek phei chu tih tak têin i intih ang u khai.

Tunah mai pawh hri vei kan inenkawlna hmun pui ber ZMC-ah khum ruak a awm tawh lo tih te, oxygen mamawhna a sâng chho zel a, damlo ten an tlachham thuai ang tih thâwm te kan han hre tan nghal ringawt a. Oxygen khawpkham tawh lo ten Ventilator an mamawh leh dawn, chu lah kan ngah lo nasa mai si. Ngun taka han ngaihtuah hian kei zawng, lungmuanga mut har ka ti a ni. Mizo kan la tlem si, he hri phiangsen hian nunna a heh si, han sawi belh vak ngaihna pawh ka hre tawh lo, inkhung te kan ning a, nunphung pangngai anga nun leh vat kan duh a nih chuan khawngaih takin, i fimkhur hram hram ang u khai. Kan hmangaih kan nu leh pa, kan pi leh pu te, kan u leh nau te kan chân mawlh mawlh ta mai a, keini mai ni lo, mi dang hmangaihte pawh keimahni vangin thihna kut vawtin a man thei leh zel te hi a lungchhiatthlakna em em chu a ni.
Thihna azawngah covid 19 lên laia thih hian lung a run ber mai awm e ka ti. Kâr kal ta mai khan ka nu u, min hringtu chhangtu chiah hi a boral a. Kan in luah an niin loh theih lohvin fimkhur taka kal loh theih a ni lo va. Nu titi thiam leh rual pawl thiam em em mai, chhung leh khatte zawng chhuak a, tlawh chhuak taima em em mai a ni a. Boruak pangngai lai ni se thlahna pangpar te, tuamna puan leh râlna pawh, mi ropui leh milian boral si lovah chuan dawng hnem ber pawl ni tura ka ngaih nu fel leh zakhawrâwi a ni. Chhiat that thulhah tuma’n kan tluk lo ti thlâwt ila, uar lua ka ni hauh lovang. Ka nu tak tak nen kan awmna a inhlat em avangin ani hi ka pawt buai nasa a, ka lawmna leh lungngaihna ka thlenna a ni a, ka tan a hluin a pawimawh em em.

 
Chutiang khawpa mite lâwm zo leh phungthlu chu ni mah se, hripui vang hian amah ui ngawih ngawihtu chhungkhat laina leh thenrual tha te, lam hlâ leh lam hnai pawh ni se, a ruang thlahin an rawn kal thei lo va. Amah thlahna atan leh a chhungte khawhar hnêm turin Pathian fak hla lah a ri thei na hek lo. Mi vengva deuhin phone-a hla play-in woofer an connect a, chu chu ka nu lu kan men dan a ni. Thihna mah nâ a, rianghlei naufa an sawi ang riaka mahni thisen zawmpui ngei mai ruang han nghah reh tlawk tlawk mai chu na tak a ni.

Hei hi tun laia mitthi chhungte chan chu a ni. Ka Mizopuite chan atan chuan nâ ka ti a, khawhar inlenpui dial dial thin, zaia Lalpa faka khawhar chhungte àwi a, an mamawh engkim ngaihtuahsaktu YMA nen, thihna zawng na teh meuh mah se hnêmtu leh puitu kan nei thin kha a ni a. Mi tha tak tak boral pawhin an phû tawk chawimawina dawng lovin, arte thi aia û táwkin an liam hi a ni hawt a, a nâ a ni. Hêng thil zawng zawng hi a thlen tawh loh nan hian hawh u, i negative hrám teh ang u!