Lawngtlai June 6 : Nimin khan hri kai 267 hmuhchhuah thar a awm a, nimin vek khan Covid-19 hri kai mi 2 an thi.
Central Jail-ah hri kai 43 zet hmuhchhuah a ni a, Central Jail awmna veng Tanhril-ah 14 hmuhchhuah a awm bawk. Kanan Vengah 12 leh Buichali-ah hmuhchhuah thar an awm a. A sang ţhang dang Bethlehem leh Ramthar vengah 7 ve ve hmuhchhuah a ni. Nimin khan hri kai leh kai lo endik aţanga kai zat hi za zela 9 point 25 a tling a. Hri kai tih lang chhuak lo 173 an awm a, lang chhuak 94 an awm bawk.
Nizan dar 10 leh a chanve khan Pu R Ralkunga (kum 92 mi), Vairengte chu ZMC ah COVID19 vangin a thi a. May 28 khan hri a kai tih hriatchhuah niin hemi ni vek hian ZMC ah dahluh nghal a ni a. Amah hi thisen sang nei a ni. Hemi hma hian Pi C Parchhingi (kum 70 mi), Electric Veng, Aizawl chu nimin chawhnu dar 1 khan ZMC-ah Covid 19 vangin a thi bawk a. May ni 9 khan RAgT hmangin hri a kai tih hriatchhuah niin May ni 11 khan ZMC ah dahluh a ni. Heti hian hri leng vanga Mizorama thi zat hi 53 an tling ta.
Hetihlai hian nimina hri kai dam tawh enkawlna hmun aţanga chhuak zat belhkhawm chu mi 335 an ni a. Ni khat chhunga chhuahtir tam ni ber a ni.
Post a Comment