Mizoram Lal la dam tlemte te zinga mi, Pu Hmungduna Chinzah South Lungpher chuan, nizan dar 11:00Pm khan kum 91 mi niin chatuan ram min pansan ta.
Pu Hmungduna Chinzah hi Lai Lal ropui Dokulha (Andaman and Nicobar Islands Jail-a a thih thlenga tang ta.) Fapa te zinga mi Pu Suichhuma Chinzah tupa a ni.
A pu Suichhuma Chinzah (L) South Lungpher Lal chu kum 55 mi a nihin Dt.12/2/1944 khan a borala Suichhuma Chinzah boral hma hian a aiawh tura beisei Pu Thanhulha Chinzah chu Vanduaithlak taka Dt.5/7/1938-a a boral tak mai si avangin Lungpher Lal nihna chu kum 1944 atangin Bawrhsap chuan Hmungduna Chinzah kutah dah in, Lal a nih tirh hian kum 13 mi chauh niin a Pi Tialchii Bawitlung leh Lal Upa ten rorelna erawh an kalpui tlangpui thung.
A hun laia Bawrhsap hnehah chuan a puitlin hma chu rorelna lam reng reng chu a Pi leh Khawnbawl upa te kuta dah intiam in, a pi (Lal nu) pawhin a tupa Hmungduna Chinzah puitlin hma chu Pasal nei lova trul pui turin a intiam ve bawk a, Bawrhsap pawh hi a lawm hle nia sawi a ni. Tichuan "the Aquisition of Chief Rights Act, 1954" hmangin Dt. 15/4/1956 khan Lal a nihna chu mizoram Lal zawng zawng te chawlhtir an nih rual khan ani pawh chawlhtir a ni ve ta a ni.
Pu Hmungduna hi MRC hun lai khan, a khua S. Lungpher bial atangin MDC atan kum 1958 khan kum 27 mi chauh niin thlan tlin niin a vanglai hian Sa 100 chuang a kap bawk. Isua Krista Kohhran IKK(Bualpui NG) chhim lama a lo pian khan, Assembly Chairman hiala thlan tlin te pawh lo ni tawh in, Eizawnna lamah South Lungpher Middle School-I headmaster rei tak niin a pension thlengin he hna hi a thawk.
Pict: Hmungduna Chinzah leh a nupui Lalnguri chinzah te, kum 2018 kuma S. Lungpher Khuain an khua Centenary an hman kuma an thlalak a ni. (Pi Lalnguri hi a la hrisel tha pangngai hle a, a fingin thusawi a thiam hle)
Post a Comment