LSA hruaitu lo ni tawh ten Thingkah IR Bn. Qtrs. CCC a awmte tan tanpuina pe
Vawiin June 11 khan Lai Student's Association-a hruaitu lo ni tawh, tlang hrang hrang awm ten Whatsapp Group an siam kaltlanga an pawisa thawh tlingkhawm ₹. 10,000 chu Thingkah IR Bn. Qtrs. CCC a awm te tan an pe.
Vawiina pawisa an pek hi Senior Medical Officer, Dr S. Thaizi chuan a dawng a, thilpek hlannaah hian LSA hruaitu hlui awm remchangte mi 7 an kal a ni. Tanpuina pawisa hi LSA hruaitu hlui aiawhin Pu K. Thansiama, LSA President hluiin a hlan a ni.
SMO Dr. S. Thaizi chuan tunhnaia Karlui - I leh Chawngte a hri kai thahnem tak hmuh chhuah a ni chu pawi a tih tu sawiin, helai area-ah hian hri kai contact in sawi duh lo, in home quarantine ṭha duh lo an tam avanga hri kai pung an ni tih a sawi a. Dr.S. Thaizi chuan LADC sorkar chungah lawmthu a sawi a, thawktu indaih lohna avangin thawktu pek an nih thute, vaccine pek kawngah nasa taka an tanpui thute a sawi. Bialtu MDC Tuturu Singh leh MLA Pu C. Ngunlianchunga chungah Dr.S. Thaizi chuan lawmthu a sawi bawk.
Tunah hian Thingkah IR Bn. Qtrs. CCC ah hian positive enkawl lai mi 7 (Mipa 4, Hmeichhia 3) an awm mek a, medical duty 5 nen, an vaiin 12 an awm mek a ni.
Post a Comment