KA HAWI MIAH LO!

Nimin lama kan sawi tawh kha kawng dangin kan chhunzawm leh ang a, HLSC result kan nghah laia buh phura ka inhlawh chungchang a ni. Kan chawmchhak nu hian kawnglawng vawi khat phur tur a la neih thu min hrilh a. Ka kal theih dawn chuan saiip leh buh tehna tel tin bur ruak phur haw tel turin min hrilh nghal bawk a. Buh phur tur chuan phur takin em lian zet phurin ka chhuak ta hnang hnang a.

Chhek in chu ka va thleng ta a, buh chu ka rut nghal mawlh mawlh a, tin 4 zet a lo ni a. Chutah saiip leh tin ruak chu ka phur tel bawk a. Kum 18 emaw chauh ka la nih avangin buh tin 4, saiip leh tin ruak rih dan turzia chu in chhut thiam mai âwm e. A rit a ni ringawt, a rit! Ka em phurh nen khan thla min laksak ta se ‘Kumhlui drama chang mek’ ka ang ber âwm asin. 

Ka buh phurhna hi khua atanga km 4 vel a ni a, kawng zal nuam, phei raih mai a ni. Mahse, ka phur chu a rih em avangin ding lamah emaw vei lamah emaw ka hawi thei lo va, km 4 vel zeta thui chu hmalam chauh enin ka zawh ngat ngat a, in ka thleng tawp mai a ni. Hawkdak viau ila chuan ka hawi hlek laiin ka phur chuan min uai thlu tawp ang a, ka che chhe hle dawn a lo ni. Ka nu chuan, “I ruh a la no si a, hetiang em ema rit chu phur tawh ngai suh ang che,” min ti hial a ni. A rit êm bawk a ni.


Thufing chuan, “I mitin hma lam en la, Ngil takin hma lam thlir rawh. I ke atân kawng tirualrem la, I kawng zawng zawng tihngheh ni rawh se. Ding lam emaw, vei lamah emaw peng suh; Sual ata i ke sawn rawh,” 4:25-27) a ti a. Pain a fate a zirtir thin chu pensan miah lo turin thufing ziaktu hian a fuih a ni. Juda lal Josia kha Pathian tih mi, lal fel tak a ni a, a chungchang an ziaknaah chuan, “Tin, LALPA mithmuha thil fel tak a ti thin a, a pu Davida kawng zawh zawng zawng chu a zawh ve a, ding lamah emaw vei lamah emaw a pensan lo va.” (2 Lalte 22:2) tih thu kan hmu a ni.

Ringtute hi van ram pana kal mek kan ni a, kraws kawng kan zawh mek a ni. Lal Isuan kan hma a hruai a, amah chu en reng chunga van ram kawng zawh tur kan ni. Ding lam emaw vei lam emawa kan pensan apiangin khawvel thil kan hmu a, kan inham buai a, kan nun a chau a, hma lam pan thei lovin kan din phah fo thin. 


Lal Isuan he khawvela rawng a bawl lai khan thilmak tam tak a ti thin a. Chung zinga pakhat chu tui chungah ke-a a kal kha a ni. Chu thil chu an hmuhin a zirtirte chuan an hlau hle a nih kha. “Thlamuang takin awm rawh u; keimah ka ni alawm; hlau suh u,” a han tih hnuah Petera chuan “Lalpa, nang i nih chuan tui chunga i hnena lo kal thu mi pe rawh,” a ti a. Isua chuan, “Lo kal ta che,” a ti a. Petera chu lawng ata a chhuk a, Isua hnen lam panin tui chungah chuan kein a kal ta a. Thli tleh hum hum chu a hmuhin a hlau va; a pil dawn ta mai a, “Lalpa, mi chhandam rawh,” tiin a au chhhak ta hial a nih kha. Petera mualpho chhan chu amah kotu Isua en lova a chheh vel a thlir vang a ni. Chuvangin hnung lamah emaw, ding lamah emaw, vei lamah emaw hawi miah lovin kan hmahruaitu Isua Krista chauh enin kan kal zel tur a ni.


Tin, heti hi a ni a, pâwna an hruai chhuah hnu chuan, “I nunna tûrin tlân chhuak rawh; i hnung lam hawi suh la,  Phaizâwl rêng rêngah hian ding hek suh; tlângah sâwn tlân rawh, chutilochuan i boral dah ang e,” a ti a. (Gen 19:17)


- P.C.Vanlalrova

Post a Comment

Powered by Blogger.