Hri laka kan him theihna turin, insumtheihna a pawimawh
Hripui leng karah Lawngtlai khawpui chu District khawpui dang te aiin tun dinhmun ah chuan hri kai kan tlem deuh avang te leh nitin a eichawp dap te hmakhua ngaiin tunkar chhung atan total lockdown kalpui a ni ta lova. Zan curfew erawh kalpui a la ni reng thung a ni.
Total lockdown kalpui ni lo mahse, mipuite zalen taka pawna chhuak turin sorkarin phalna min pe lova. Kan duh leh mamawh kan lam dawn anih pawhin VLTF lehkha ken tel zel a ngai a ni. Chutiang tur chuan VLTF te pawh mahni veng ah theuh uluk leh zuala duty tura ngaih an ni a. VLTF lehkha nei lova chhuak te erawh chuan Executive duty in an man in pawisa an chawitir tho dawn a ni. Engpawh chu nise, pawisa chawi hlauh vang emaw lam ai mahin hri kan hlauh avang zawkin pawn kan chhuah loh ngam te pawh hi a ngai ta hle mai. Kan khawpui ah sorkarin Total lockdown kalpui lo mah se, hri laka kan him theihna turin mipuite lam zawk hi kan insum a ngai hle mai.
Total lockdown a ni lova, Bazar ah kan zi huai huai a, hri hi kan lo hlau vak lo em ni le aw, tih theih tur khawpin kan zalen a. Kan zalenna kan hmang sual anih hlauh chuan, a hnu ah kan la hrehawm viau dawn a ni. Chuvangin, mamawh kan nei lo emaw tih tur pawimawh lutuk kan nei lo anih ngawt loh chuan pawn chhuak tam lo ila, insum hram hram ila, hri hi kan duh reng vang emaw duh loh reng vanga kan kai theih emaw kai loh theih lam ni lova. Mi hausa leh rethei a thliar chuang si lova, kan fimkhur loh chuan hri lakah kan him lovang a, kan khawpui hi kan buai hle ang tih pawh a hlauhawm tak zet a ni.
Nang leh i chhungte, i thenawm khaw veng te hri laka an him theihna turin tul leh pawimawh anih ngawt loh chuan pawnah chhuak lo hram la. In ah kan tawm tam hian midangte tan malsawmna kan ni tih hi i hre reng ang u.
Post a Comment