BELGIUM VS PORTUGAL 12:30 Am
Estadio de La Cartuja, Sevilla
Fifa ranking No.1, tun hnaia chetha tak Belgium leh Champion lai Portugal te tournament lian tham a an intawn vawikhtana tur ni mahse, a hmuhnawm dan a nep chuang dawn lova. Euro 2020 round of 16 zingah inkhel ropui leh mite ngaihven a ni hial awm e.
Belgium hian football ah _Golden Generation_ an hmang chho mek a, player an nei tha in 2018 WC semi final a an chakloh hnuah hnehtu an tawng meuh lo a ni. Group stage inkhel vawi thumah chak loh nei miah lova solid point 9 hmuin R/16 an lut a. Inkhel vawi thumah goal shoot vawi 32 neiin goal 7 an thun a, an lamah goal khat chiah a lut thung a ni.
Ball an thiam vanga Brazil of Europe an tih mai champion lai Portugal pawh hian an vanglai an tawng chho ve mek a, group match ah goal shoot vawi 28 neiin goal sarih an thun a, an defence erawh a khauh tawk lovin, an lamah goal ruk lai a lut thung a ni.
Tun hi World Cup leh Euro a an in tawn hmasakna ber tur a ni a, friendly leh hun danga an inkhelh vawi 18 ah pawh an inhneh tawkin, Portugal vawi 6 a chak laiin Belgium vawi 5 a chak a, chak zawk awm lovin vawi sarih an in hneh tawk thung a. Belgium hian Portugal lamah goal 22 a thun tawh laiin Portugal pawhin goal 21 an thun tawh thung a. Belgium in Portugal laka hnehna a chan hnuhnun ber chu kum 32 lian daih tawh ah a ni. An intawn hnuhnun ber 2018 ah goal awm lovin an inhneh tawk a ni.
Mahni in ven aia, a nawr lam uar ve ve an ni dun a, zanin pawh hian attacking football kan hmuh ngei a beiseiawm hle. Belgium lamah Man-City midfielder Kevin De Bruyne a che puiin, Belgium goal 8 zinga goal 5 ah a inrawlh vek a, khawvel a midfielder duhawm ber a nihna pawh a pholang hle. Portugal lam tan ven ngun ngai ber a ni ang.
Belgium leh Inter Milan hmatawng feet 6’3 laia sang Romelu Lukaku hian 2018 World Cup hnuah Belgium tan match 21 ah goal 23 a thun a, Euro 2020 match thumah goal thum thun tawhin KDB nen an khelh dun ngat hi chuan an tawrhhlelhawm tak zet a ni. Real Madrid hmatawng Eden Hazard leh a nau Thorgan Hazard te pawh tawrhhlehawm tak tur an ni ang.
Portugal lamah an Captain leh an innghahna Ronaldo hi kum 36 a upa ni tawh nain, tluk loh rim a la namin, match thumah goal 5 lai a thun tawh a. An khelh pui tur Lukaku pawh chuan, _‘Hetiang zat kum a ni tawh chungin a la ropui zel a, amah anga player chung chuang nih ve theih hi ka duh thusam a ni,’_ tiin Ronaldo a ngaihsan zia a sawi. Ronaldo bakah Diogo Jota, Premier League a che tha tak Bruno Fernandez pawh huphurhawm tham an ni.
Belgium hian kum 1980 hnuah a hmasa ber atan final luh ngei an tum ruh hle, Euro 1980 final ah W.Germany lakah 2-1 a an tlawm kha an la theihnghilh thei lo a ni.
- biakthansanga khiangte
Post a Comment