ENGLAND VS GERMANY 9:30 Pm
Wembley Stadium, London
Football mai nilo politic ah pawh inhmelna hlun leh indo rap rap thin, England in London khawpuia khelmual hmingthang Wembley Stadium-a Germany a mikhual tur hian ngaihven a hlawh hle. He Stadium ropui thutna seat 90,000 zet awmna ah hian Euro ’96 semi final ah German chuan England an lo hneh tawh a, kum 25 liam ta a an chak loh kha English ho hian an la theihnghilh thei miah lo a ni.
Hnam ropui leh fing hmasa tih takah official lova an inkhelh hmasakna ber phei chu Nov.23.1899 ah Sportpark, Berlin ah a ni daih tawh a, official chuan World Cup tan kum May 30.1930 ah a ni thung. Euro bikah vawi 4 an intawn tawh ah vawi 1 ve ve chakin, tum 2 an in draw a, World Cup ah vawi 7 an inkhelh tawh ah England vawi 2 chakin German vawi 5 a chak thung a.
Wembley Stadium bikah hian vawi 12 an inkhelh tawhah England vawi 4 chakin German vawi 2 a chak ve a, vawi 6 an in draw. Zanin hi England team ten Wembley Stadium-a an khelh vawi 300na tur a ni a, chumi lawm nan chuan chak ngei pawh an tum ruh hle a ni.
England hi qualifying atanga a chet that chhoh em avang leh an khawtual ah hlir khel tur an nih avangin rin an hlawhin, champion tur pawh a beiseiawm ber te zinga mi an ni a. Group stage ah hneh loh nei lovin R/16 a lut chho va. Tum 4 champion tawh German hi Group stage ah 2na niin R/16 a inpet kai bawk a. Kum 2017 a friendly match ah goal awm lova an in hneh hnuah, a hmasa ber atan London khawpui ah an in hmachhawn leh dawn ta a ni.
An game a in ang lovin England hian mahni inveng tak chunga, fimkhur takin an attack tlangpui a. Hei vang hian group match vawi 3 ah pawh goal shoot vawi 22 chauh an nei a, goal hnih thunin, goal erawh an chhuah lo thung a ni. Mahni inveng tak chunga an khelh avang hian an game reng reng pawh a nung lovin, dul deuh hnuk angin a lang thin a ni. German thung hi chu attacking game khel chi an ni a, hnam huaisen tih takah an nawr hmiah hmiah zel a, group stage ah pawh goal shoot pawh vawi 40 neiin, goal 6 lai an thun a ni. An khel pawh a hnuhnawmin, a rang vat thin a ni.
German hian group stage ah beisei an pha lovin, an coach Joachim Low chuan knock out stage ah chuan an che a dan daih tur thu a sawi a, a sawi sual lo mai thei a ni. Tawn hriat ngah ho hi chu an thleng sang tawlh tawlh a, chumi rual chuan an che nalh telh telh zel a ni.
England lamah player inhliam leh suspend vanga khel thei lo tur an awm lova, Scotland nen an khelh tum a, Chelsea a an khleh pui lo hnim hnaitu, khunghran Mason Mount leh Ben Chilwell te pawhin an khelh leh theih hmel tawh a. Y/Card hmuh vanga Czech nen an khelh a chawlh tir Phil Foden pawh a inlan thei ang, a hma a Y/Card an hmuh kha quarter final ah chuan a thi (expire) tawh dawn a ni.
German lamah Chelsea player Antonio Rudiger chuan kar tawp lamah khawsik vangin training a zawm theilo nain, zanin chuan a inlan tho hmel a. Hliam te nau nei Lukas Klostermann erawh a chawlh hmel thung a, khup na Jonas Hofmann chu a dam fel tawh thung a ni.
German hi an ball nawr a nat viau laiin defence lamah duhthu an sam tawk lova, match 3 ah goal 5 lai an chhuah avangin World Cup hnuhnung ber a Golden Boot dawngtu Harry Kane te, Sterling leh Man-City in pound maktaduai 100a an dawr mek Aston Villa midfielder Jack Grealish te lo dang tur chuan Christian Gunter te, tawnhriat ngah kum 31 a upa Mats Hummels leh Rudiger an in sanmar deuh a ngai ngei ang. German lamah kum 22 mi, Premier League a hming chher chho mek Chelsea striker Kai Havertz leh Bayerm Munich winger che rang feet 5’9 a sang Serge Gnabry te ven ngun ngai zual tur an ni ang.
Kum 1990 World Cup semi final a German in England an hneh tum a German Captain Lothar Mathaus chuan England chuan player an nei tha a. German chu an hneh mai a beiseiawm thu a sawi a, mahse an hneh dawn anih pawhin minute 90 chhunga an chak ngei a ngai ang a ti.
England hian World Cup leh Euro an khelh tawh ah, hun pangngaia an chak loh chuan, extra time leh shootout ah chak an la nei meuh lo a ni. Kum 1990 WC semi final ah hun pangngai ah in hnehin, shoot out ah German lakah 3-2 in a tlawm a, Euro ’96 semi final ah hun pangngaiah 1-1 a inhnehin shootout ah 6-5 in German lakah bawk a tlawm leh a ni. Midangin an pet goal vek laiin, tuna an Manager Southgate hian a pet goal lo hlauh a ni!
Euro 2004 quarter final ah Portugal nen hun pangngai ah 2-2 a inhnehin shootout ah 5-6 in an chak lo a. Kum 2018 World Cup semi final ah Croatia nen hun pangngaiah 1-1 a in hnehin, hun pek belh ah a chak lo zawkah an tang leh bawk a ni. Penalty pet a ngaih leh tak hlauh a, an chetsual tawh loh nan uluk taka penalty pet an zir thu England coach Southgate chuan a sawi a, sawt pui tak ang maw.
Kum 55 daih liam ta a FIFA WC final ah W.Germany 4-2 a hneh a, Champion Nomawi an lo chawina Wembley Stadium-a entu mipui 45,000 hmaah Three Lions (England) hian chakna hlado nen hahum thei tak ang maw?
-Biakthansanga Khiangte-
Post a Comment