SWEDEN VS UKRAINE 12:30 Pm
Hampden Park, Glasgow
Euro 1992-a semi finalist Sweden hi group stage match 3 ah vawi hnih chak a vawi 1 drawin R/16 a lut a, chung match 3 ah chuan goal shoot vawi 28 neiin, goal 3 an thun a, goal 2 an chhuah thung. Ukraine hian group stage ah vawi khat chakin, vawi 2 a chak lo thung a, 3na zinga che tha pawl zingah telin R/16 a lut a ni.
Ukraine hian coach atan a hunlai a striker tha leh hlauhawm ber ni pha ngat Andriy Shevchenko an hman vang nge an ball bawh a nain, group stage match 3 ah goal shoot vawi 37 zet an nei a. Goal 4 ti lutin an goal 5 an chhuah thung a ni.
Sweden leh Ukraine te vawi li an in tawn tawh ah Ukraine an la chung nungin vawi thum an chak a, Sweden vawi khat an chak ve thung. An in tawn hnuhnun ber kum 9 kal ta a Euro 2012 ah group khat ah awm hovin, Sweden nen an khelh tumin Ukraine coach Andriy Shevchenko hian goal hnih thunin a vawi khatna atan final round a luh pui tawh a. Zanin ah hian Coach angin a vawikhatna atan quarter final luhpui leh ngei a tum hle a ni.
Sweden pawh hian Euro ah hnuhma ropui an la hnuchhiah meuh lova, tun hi Euro 2004 hnu lama knock out stage an dai leh hmasakna ber a ni. An khelhna tur Hampden Park ah hian vawi thum an khelh tawhah vawi khat chakin, vawi hnih a chak lo zawkah an tang tawh a, zanin hi chuan chak loh an tum tawh lo hle.
Ukraine pawhin Hampden Park ah hian Euro 2008 qualifying ah Oct.2007 ah a ram neitu Scotland te hmachhawn tawhin 3-1 in an chak lo tawh bawk a, Ukraine tan a goal awmchhun chu an coach Shevchenko thun hi a ni. He mual a an record chhe dun tak hi zanin hian a tu zawk hian nge nuai reh tak ang le?
Sweden hian 4-4-2 formation in an khel leh a nih chuan a hmatawngah Alexander Isak leh Mainz striker Robin Quaison emaw Emil Forsberg te emaw an din hmel a. Real Sociedad striker kum 21 a upa feet 6’4 laia sang Isaka hi a naupang ang ngawt a en chi a nilo. A tlan chakin, ball a thiam a, boruak ah a hlauhawm ang bawkin, lei ah pawh a tawrhlelhawm hle tho a ni. An defence Victor Lindelop te, Marcus Danielson te Lustig leh Robin Olsen te an inkawp fuhin, patlang an awlai lo hle bawk a ni.
Ukraine pawh hian 4-4-3 formation bawk an hmang a nih chuan Dynamo Kiev defender kum 18 mi Illia Zabarnyi hi tawnhriat ngah zawk Karavaev te, Matviyenko te ang bawk a rintlak a ni a. Midfield chu Atalanta chhuanvawr Ruslan Malinovskyi an ho theih chuan an phusui khawp ang. A hmatawngah Andriy Yarmolenko (West Ham) te, Gent striker Yaremchuk leh Tsyhankov an din a hmel a, Sweden defence tan pawh inthlahdah hman a ni lovang. Ukraine lamah Viktor Tsyhankov leh Oleksandr Zubkov te ke na a la dam chian loh avangin inlan thei lo tur a ngaih an ni.
Group stage ah vawi khat chiah an chak avanga puanthuan tel mai tura an inngaih thut thut tawh laia, R/16 an lut leh tlat chu Ukraine tan chuan a lawmawmin an keeper Georgiy Bushchan chuan, _‘Last chance ah Lady Luck kan nei a, hetiang vanneihna hi a vawihnihna atan neih nawn leh ngei kan tum a ni,’_ tiin an la dai ngai loh ram, quarter final luh ngei an inbeisei thu a sawi.
- biakthansanga khiangte
Post a Comment