CEM MESSAGE ON GREEN LADC DAY 2021

Manghmunga Chinzah, CEM LADC

        

  A hmasa in Green LADC Day 2021 pualin Lairam mipuite chibai ka buk Che u in Duhsakna sangber ka hlan a che u.

Kan hriat theuh angin Mizoramin Covid-19 hripui leng avangin harsatna nasa tak kan tawk a, nunphung a khaihlak nasa hle. Chutih mek laiin  kumin 2021 hian thal a na a, ruahtui kan dawng har a,  Mizoram-in kum dang aiin kangmei kan tuar nasa zual a. LADC area pawh kan bang bik lo. Phawngpui National Park pawh a chhehvel khuate leh Forest    department a thawktu ten nasa takin kan veng a, kan chhanhim thei hram a ni. Ramkang hian  kan ramngaw hlu tak leh a chhunga cheng nungcha tinrengte min tih chereu sak nasa hle thin a, hei hi kan ram tan channa nasa tak a ni tih kan hriat thar leh a pawimawh takzet ani.

Ramkang hian thing leh mau leh Nungcha hlu tak tak te a kangral mai ni lovin, Kan ram chhunga lui lian leh Luite a tikang nasa hle a, Khaw hrang hrang ah kan tui lakna hnar a kang avangin harsatna kan tawk nasa tan hle a ni.

Climate Change avangin khawvel zau zawk leh kan ram ngeiah pawh harsatna kan tawk mek a, sik leh sa a mumal lo tial tial a, khua a lum sawt hle a, khuarel chhiatna thlipui, tuilian leh leimin te kum tin a thleng tam ta hle a, Hemi siamtha tur hian mitin ten tih theih kan nei theuh a, chu chu kan ramngawte humhalh a, a tam thei ang ber thing kan phun a, kan enkawl puitlin theuh hi ani.

Heng hi hre rengin LADC chuan a tam thei ang ber thing phun anih theih nan kum 2015 atang khan Green LADC Day hi a lo kalpui tawh a, kum tinin thingtiak engemaw zat kan phun thin a, a hlawhtlinna pawh kan hmu chho mek zel a, Kumin 2021 pawh hian Covid-19 hripui lengin harsatna tam tak min siam in, nunphung ti khaihlak hle mahse, Hripui laka kan himna tura sawrkar in inkaihhruaina (SOP) a siamte zawm chungin thing phun uar turin kan ram mipui leh LADC a thawktu zawng zawng te ka sawm a che u.

Pathianin Lai fate tana min pek kan ram mawi leh nuam tak, ramngaw, thing leh Nungcha tinreng te, Lui tui leh boruak thianghlim taka, a thuammawi Lairamhi a neitu kan ni a, kan tu leh fate tan luah zui zel tur ram kan neihchhun a ni. Tuna a luah mek tute hian kan dimdawih thiam a, kan humhalh a, Thangthar lo awm zel turte tana chenna tlak ram nuam a siam turin mawh kan phur a ni.

KA LAWM E

Post a Comment

Powered by Blogger.