West Bengal MLA election kaihhnawih kalzelah Trinamool Congress leh Bharatiya Janata Party worker te chu an intibuai a, hei vang hian mi 10 chuangin nunna an chan phah.
Buaina hi hmun eng emaw zatah a thleng a, BJP lam chuan an party workers zingah thi leh hliam an awm a, dawr tam tak tihchhiat a nih bawk avangin sorkar laipui chu thilthlen dan chhuichiang tura an duhthu an sawi. Media lam chuan TMC leh BJP supporters te hi Burdwan district khan Pathianni leh a tuk Thawhtanni khan an buai a, hetah hian mi 4 an thi niin an tarlang a, TMC lam chuan thi zinga 3 chu an party mi niin an sawi. BJP office chu hal a ni a, mi tam tak chu sahimna zawngin an tlanchhia a ni.
West Bengal Governor Jagdeep Dhankhar chuan intualvuakna thleng chungchangah hian nimin khan prime minister Narendra Modi chuan a biak thu leh thil thleng chu a ngaih thutak thu hrilh niin a sawi a, nunphung pangngaia a awm leh thuai theihnan hmala turin a hriattir tih a sawi. Hemi hma hian Governor chuan police leh Kolkata Commissioner te chu bia in politics thil avanga tharum thawhna te, in hal leh tualthaha thleng chu democracy tan a zahthlak thu hrilhin hma la tur hian a lo hriattir tawh bawk a ni.
Nabagram biala BJP hotupa Ashish Kshetrapal chuan, "Trinamool Congress te chu helai hmunah hian lo kalin bengchheng an rawn siam a, kut hial min thlak a, keni lamin kan beih let hnuah an tlanchhia a, kawng dang atanga lo kal lehin ka chhungte pawh kut an thlak a, ka nu pawh an kutthlak vang hian a boral," a ti. An party worker Pa in nunna an chan niin a sawi bawk. Police te chuan buaina thleng avang hian mi 23 an man tawh a, central forces lam pawh helai hmunah hian tirhluh nghal an ni.
Post a Comment