Tripura state sorkar chuan khawpui hmun hrang hrang 20 ah zan curfew neih hun chhung tur a pawt sei.
Tripura-ah hian zan curfew hi dar 6 atanga a tuk zing dar 5 thleng neih niin vawiin May 4 atanga hman nghal tur a ni a, khawpui hmun hrang hrang - Agartala Municipal Corporation, Municipal Councils 13 leh Nagar Panchayats hmun 6 a huam dawn a ni. Hetianga zan lam curfew hun tih danglam chungchang hi education minister Ratanlal Nath chuan hri inkai darh hlauhna vang a nih thu a sawi a, hemi hun chhunga hman tur inkhuahkhirna dan thar tur pawh a chhuah thuai tur thu a sawi. Office kal hun chhung pawh zing dar 10 atanga tlai dar 4 thleng tura tih danglam a ni bawk.
Ratanlal Nath chuan an state-a Covid-19 hri kai hi an pun zel thu a sawi a, "April 25 khan sample enfiah sak zingah positive 98 hmuh chhuah an ni a, a tuk April 26 khan positive dang 111 hmuhchhuah leh an ni. April 28-ah chuan positive 166 hmuhchhuah niin April 29-ah chuan 141 a ni a, April 30 ah 173 leh May 1 kha chuan nikhat chhunga positive hmuhchhuah hi 247 an tling tawh. Hei vang hian state sorkar tan ngawi renga awm mai mai theih a ni tawh lova, thil thenkhat thlak danglamin chu chu kan hmang nghal rum rum a ni," tiin a sawi.
Minister chuan hospital leh centres hrang hrang te dinhmun thlirin MBBS 100 leh Nurse 100 contract basis-in chhawr an nih tur pawh a sawilang a ni.
Post a Comment