PRESS RELEASE OF ZPM LEGISLATURE PARTY
No.2021/2 Dated 7th May, 2021
Covid19 hripuiin a vawi hnihna atan min han run leh takah chuan kan thiam leh theih ang tawkin ramhruaitu ten hma kan han la leh ta a. Tuna kan sorkarin hma a lakna hrang hrangte hi kan thlawpin puih an ngaihnaah chuan kan inpeih reng a ni. Chutih rual chuan kan hotupa ber, kan Chief Minister in sorkar sum dinhmun mipuite hrilhhriatna a nei ta miah lo te leh a duhna lama sum seng thei reng chunga sorkar hnathawkte hnena vehbur a khawn ta mai hi ram hruaitu awm dan tur a nih loh avangin keini hi ngawi theiah kan indah ta lo va. Kan tanrualna a that zawk nan leh Chief Minister’s Relief Fund (CMRF) a pawisa pe duhte tan pawha rilru dam taka an pek theihna turin, Chief Minister leh Finance Minister a nih angin, state mipuite hnena thuchah siam a, kan harsatnate sawifiah turin Pu Zoramthanga hi kan phut tlat a ni.
Kum 2021-22 budget-ah SEDP atan Cheng Nuai 40,000 a dahte hi Covid19 avanga ei leh in lama harsatna tawkte, kan ral hmatawng - VLTF/LLTF te tanpuina atana hmang tur leh Mizoram State Health Care Scheme sum bawm a Cheng Nuai 20,000 chuang la awm hi Covid19 vei ten, a thlawna inenkawlna an dawn theih nan a hmang turin kan ngen tak meuh a ni. Mahni duhsak zawngte tana hna siam sak hi ti tawpin, mipuite tana luang chhuak zawk tawh turin kan CM hi kan beiseiin kan phut tlat a. Kan sum hman danah hian tuna kan mamawh ngawih ngawih leh kan la dah that theih hrih tur hi thliar a hun kan ti tawh hle.
Covid19 avang hian harsatna tam tak la hmachhawn thei kan ni tih hre reng chungin MLA Fund atanga a sum hlawma (cash) LLTF/VLTF te leh mipui harsatna tawkte tanpui theih dan tur hi min ngaihtuahpui turin kan ngen nghal a. Tin, kum 2021-22 chhunga kan budget hi hman a nih hma hauhvin hripui dona atana pawh pen a ngaih leh tak avangin, a nihna tur taka hman anih theih nan, Assembly Session kovin Budget Re-appropriation (Siam thatna) neih ni rawh se.
A tawp berah chuan kan Assembly Speaker in Pu Lalduhoma lakluhna tiam chin awm lova a thulh ta mai kha pawi kan ti a. Kar lehah hian, fimkhur tak chungin, MLA atana la lut ngei tawh turin kan ngen nghal a ni.
Sd/-
(Dr VANLALTHLANA)
Secretary
ZPM Legislature Party
Post a Comment