Mizoramah ni tin oxygen cubic metre 4,800 siam thei, mamawh phuhruk beisei

Lawngtlai 1st,May.2021 ;  Special Secretary, Health & Family Welfare R. Lalramnghaka’n oxygen siam chhuahna khawl nei mi pali bakah Aizawl cilvil hospital, ZMC, Falkawn leh district hospital thenkhata siam chhuahna atangin ni khatah oxygen cubic metre 4,800 siam theih a nih thu leh hei hian Mizoram mamawh chu a la phuhruk theia ngaih a nih thu a sawi.

 

 Larsap PS Sreedharan Pillai hova hri leng chungchanga nimina Health Minister Dr R. Lalthangliana, MKHC, joint NGO leh ex-services league aiawhte Raj Bhavan-a thutkhawmah he thu hi H&FW special secretary chuan a sawi a.Oxygen siamna khawl neih belh tura hmalak mek a nih thu leh ventilator pawh ngaihtuah belh mek a nih thu pawh sawiin, hri kai na zual enkawlna Remdesvir pawh vial 1000 chah mek a nih thu a sawi bawk.

    Mizoram larsap chuan, “Covid-19 thawh khatnaah Mizoram chu kohhranmite leh tlawmngai pawlte thlawpna bakah mipui thuawihna zarah state him ber pawl kan ni,” a ti a. A thawh hnihna intan leh mekah fimkhur inzirtir uar hun a nih thu leh tuna hmalak thatin rah tha a chhuah tur thu a sawi.

    Larsap chuan Covid-19 thawhhnihna lakah India ram pumpui dinhmun a that loh avangin Vice President leh Prime Minister ten Larsap te chu state sorkar hmalakna a chak zawk theihna tura Raj Bhavan hmang tangkaia a tul anga state mamawhte hrechianga central-a thlen thin tur te, mipui  zirtirna kawngah kohhran leh khawtlang hruaitute nasa zawka thawhpui turtea thurawn an pek thu a sawi bawk.

    Health Minister Dr.R. Lalthangliana pawhin inkhuahkhirhna khauh zawka ni sarih dang kalpui tum a nih thu leh chief minister pawhin tha a tih thu a sawi a. Covid-19 do kawngah kohhran mipui leh an hruaitute, YMA leh tlawmngai pawl hrang hrangte leh VC/LC te chungah sorkar a lawm hle tih sawiin, sorkar thlawpa thawhpui chhunzawm zel turin a sawm bawk a ni.