Mizoram Chief Secretary leh SDMA State Executive Committee chairman ni bawk Pu Lalnunmawia Chuaungo chuan vawiin tlai khan thupek chhuahin Mizoram pum hri leng avang inkhapkhipna kalpui mek chu May 3 zing dar 4 atangin May 11 zing dar 4 thleng chhunzawm a ni dawn a ti.
Inkhuahkhirna kar hnih kalpui meka ruahmanna siam aiin lockdown kan hmachhawn tura inkhuahkhirna hi a khauh zawk a. Zin veivah pawh a ṭul tawp a nih loh chuan zin veivah loh tur a ni a, zin veivah phalna LLTF/VLTF hnenah an la tur a ni. Phalna nei lo chu mahni in compound chhuah san khap a ni a, building khata awm pawh intlawhpawh loh tur a ni. Nitin mamawh lei tur, damdawi lei tur leh in entir turte chiah chhuah phalna pek tawh tur a ni. Phalna nei lo lirthei engmah chhuah phal a ni lo bawk.
Chhungkua/mimal eizawnna kaihhnawih ni lo a huhova lui kal, ramhnuaia picnic/ intihhlim, hiking leh adventure sports te khap a ni.
Tin, zan lam curfew pawh sawn hma a ni a, zan dar 7 aṭanga zing lam dar 4 thleng curfew hun hi a ni ang.
Nitin eichawp dawr, thlai leh thei, sa leh sangha zawrhna, thlai chi, lei ṭha, hmanraw dawr te leh oil leh spare part zawhna, insakna bungrua zawrhna te chu VLTF te hriatpuinain thawhṭanni, nilai leh zirtawpniah hawn theih a ni ang. Tin, hmun khata mipui pungkhawm tur ven nan bazar puiah chawhmeh zawrh khap a ni. Chutih rualin mipui mimir awlsam zawka chawhmeh an hmuh theih nan VLTF hi hmun hrang hrangah ruahmanna a siam ang.
Hei hi inkhuahkhirhna kal lai mek aia a danglamna deuh a ni a, a tam zawk te chu inkhuahkhirhna kal lai mek nen a danglam lutuk lo.
Post a Comment