I POSITIVE ANG U - Zoremi Hmar Zote

I POSITIVE ANG U

- Zoremi Hmar Zote

Tun laia tawngkam kan hman tam ber, chhungkua leh khawtlangah te, chanchinthar lam thleng pawha kan sawi rik tam ber pawl chu. ‘Negative’ tih leh ‘Positive’ tih thu hi a ni mai âwm mang e aw ka ti deuh; ram thenkhatah pawh a nih ve tho hmêl bawk. Ni e, loh theih loh-in hripui râpthlak takin min nuai vel mek a, ni tin hri kâi thar kan pung zut zut a, vanduaithlak tak maiin kan Zohnahthlâkpui ngei nunna pawhin a tuar ta mawlh mawlh mai a, a pawiin a runthlâk tak meuh meuh a ni.

Covid 19 chungchanga infuihna te, fimkhur a tulzia pawh nikum lamah khan ka ziak zo vek tawhin ka hria! Chuvangin tun tum chu hripui chungchang lo deuh te pawh han ziak ve ta ila, dem ka hlawh viau lovang chu maw! Kan kài theih dan te, kâi lo tura mahni inven dan pawh kan hre bel hlúi hlawm tawh bawk a, sawi nawn fo pawh ninawm lamah a kal ta lek lek zawk mai.

Hripui chauh ni lo, mihringah pawh hian Negative leh Positive kan awm hrangin ka hria. Thil reng reng, a êng zawnga thlir chi, vanduaina leh harsatna tawh châng pawha a chhe zawnga thil ngaihtuah hah vak vak ngai lo, hma lam hun atana beiseina nei tlat mi kan awm a. Chûng mite chuan harsatna an tawh pawhin an beidawng mai ve ngai lo va, Chhûm dumin vân khuh rih mah se, kian hun neiin Ni êng mawi tak a la rawn chhuak dawn tih an ring tlat a, harsatna leh manganna a lo thlen pawhin hneh thei tura chakna an ngah bik a, an tuar a chhel a, tlân chhe mai lovin hneh an tum a, hnehtu niihna pawh an hlawh nge nge bawk.

A tha zawnga thil thlir mi chu rilru chhe tak leh sual tak an awm ngai meuh lo. Hrawn hrehawm an awm lo va, an bula awm a hahdamin a nuam a. Thup leh zêp tít têt awm lova zalen taka kawm theih an ni thin. ‘A tha zawng leh êng zawnga thil thlîr mi’ han tih hian, engmah vei lo, pawisak em em pawh nei chuang lova pawngpaw Khâu phâr thawven ringawt lam kha sawi ka tum a ni chuang lo va. ‘Engkim a tha leh vek mai ang’ tihna rilru nena harsatna hmachhawn ngam zawk a ni, ka sawi ni.

 

Accident thâwm a lo awm a, ‘A va zia lo em ve aw!’ ti mai thin kan awm a. ‘An rui a niang’ ti chi kan awm bawk. Tute nupa emaw inthen thâwm a lo awmin, ‘A va pawi ve, inthen hlen suh se, naupang an khawngaihthlak’ ti nghal mai leh, ‘An nu/an pa a lêrh a niang’ ti chi pawh kan awm. Chu mai a la ni lo, mi tu emaw, an nun dan leh mizia kan va hriat em em ni lo pawh, ‘Zû a in thin ka ring…a thinchhiat hmel, a khirh hmel, a chuti khati ngawt ang’ la ti hrám duh pawh kan la awm cheu! Sawrkar thil tih dik lo deuh ni-a langah pawh ‘An lâk tlâk loh ngei mai; sum an duh chuti khati’ ti-a, an tihthat hmuh hmaih lui tlat chi kan awm laiin, an tihsual lam aia an tihthat sawi lang hram hram kan awm a. Chhungkaw chênho kawngah pawh thatna lai inhmuhsak harsa ti tlat, an tihsual chhun sawi vung hlurh chi kan awm a, tihsual palh a awm pawha a tisualtu lung damna tur zána tawngkam chhâk chhuak thin ‘rilru positive’ pawh kan awm tho.

Sawrkar a ni emaw, kan thiante leh chhûngte emaw, ina kan chênpuite ngei pawh ni se, kan chunga an sualna hi han sawi den den ta ila, tam sawi tur kan hre hauh lovang. Chutih rualin an thatna erawh thialpàwn kham úrh khawp paw’n sawi ila, kan sawi zo thei kher lovang. Ka pa min fuihna hi tha ka ti ngawt mai, “Mo i ni a, i pasala chhungte laka i lungawi loh a, rilru na taka i awm a nih chuan, an sualna zawng kha lehkhapuanah ziak la, an thatna i hriat apiang kha ziak bawk la; an thatna aia an sualna ziah tur i hriat hnem chuan mi rawn chhuahchhàl thei ang; i pasal leh a chhungte rêl tura i rawn lên ka remti hauh lo a nia, kum khatah vawi hnih rawn leng la a tawk chiah,” tiin. A ni reng lah tak a, kan lungawi lohna han ziak chhuak nghauh nghauh mah ila, kan chunga an thatna han ziah ve meuh chuan a lo tam fé zawk tak tak a lo ni.

Kan sawrkar inrelbawlna kawngah pawh, ‘palh zeuh’ chu a thang chak em em a, a ka kua apiangin ngaihdan mawlmang puipui nen kan han vawm zui luih luih a. An tihthat erawh kan tlangaupui mawh viau lawi si; hei hi thil tha lo tak a ni. Kohhran thilah emaw, inthenawmkhawvenna kawngah te, thian leh thian inkarah leh chhungkuaah, ‘Positive’ hi kan mamawh niin ka hria; nupa karah ngat phei chuan a pawimawh leh zual em em. Covid 19 erawh positive awih loh aw. Hringnunah, kan ni tin khawsaknaah, kan ngaihtuahna leh rilru, kan kam chhuak thleng hian positive ila, nunna atan a him ber a, hringnun pheikhài a rualrem a, a hahdamthlak em em bawk. Rilru khà lutuk leh a chhe lam sawi nuam timi chu an hrisel thei lo va, an hmel pawh a chhe tlangpui!