Lawngtlai 19.05.2021 : Tun hnaia Bungtlang South a, kangmei tuarte tanpui turin Zo Inspiration chuan Aizawl lamah hma lain; vehburte an khawn a, kangmei tuarte tanpui nan hian sum fai Cheng Nuai Thum Sang Sarih (₹. 307,000/-) lai an hmu a ni. 



Zo Inspiration-te hi Bungtlang (S) Welfare Aizawl ten motor pakhatin an lo tawiawm a ni.

Zo Inspiration leh Bungtlang South Welfare Association (BWA)-te hian Aizawl tangin Lawngtlai vawiin 19/05/2021 (nilaini) @ 6:30pm hian an lo thleng a, Bungtlang (S) bialtu MDC - Pu LN. Lalhmachhuana'n Thingkah daiah lo hmuakin alo dawng sawng a ni. 

Aizawl atanga lo kalte hian VLTF lehkha leh RAgT Test Certificate an lo keng vek a; Lawngtlaiah hian Pu LN. Lalhmachhuana'n zanriah alo buatsaih sak hlawm a, dar 8.00pm vel khan Bungtlang South panin an liam thla leh nghal a ni. 

Zo Inspiration leh Bungtlang South Welfare Association (BSWA)-te hian kangmei tuarte a hmunah tanpuina hlanin Aizawl an pan leh nghal ang.

BWA hi 2017 a din niin, Aizawl lama Bungtlang (S) leh a chhehvel damlo, mi harsa leh mangangte ṭanpui a, ruang chhuak tur te chena buaipuitu, khawtlang mamawh hrang hrang te buaipuia chet thawh reng an ni. He Pawl Founder chu tuna Pu LN. Lalhmachhuana, Bungtlang South Bialtu MDC hi a ni. 

Post a Comment

Powered by Blogger.