HNAHTHIAL NORTH I VLTF TEN THUCHHUAH AN SIAM

 HNAHTHIAL NORTH I VLTF TEN THUCHHUAH AN SIAM

Press Statement

(29th May, 20121)

Hripui avangin khaw hrang hrangah ngawrh takin kan duty a, keini Hnahthial North I VLTF pawh chhun zan zawmin (24 hrs) Hnahthial hmar lam kawtchhuah “Kawnpui”-ah kan duty thin. Duty-te hian khualzin leh driver-te harsatna phak ang tawkin kan lo tanpui ve thin a, an mamawh hrang hrangte kan ngaihtuahsak ve thin a ni. Ni 27/05/2021 tlaia Hnahthial North I VLTF duty-te leh buhfai phur motor MZ01T1777 driver Lalbiakdika te chungchangah thu dik tawk lo vawrh darh a ni hi pawi kan tiin thu dik zawk kan han tar lang ange.

1. Ni 26/05/2021 nilaini tlaiah MZ01T1777 leh a thiante chu duty awmna Kawnpui-ah lo thlengin Supply Godown-a tlang an dil a. Zana unload a rem loh avangin khaw chhungah riah luh a rem loh thu hriattir an ni a. Bungraw unload tur hnam dang driver-te pawh an awm nual avangin tuallaia chhuak mai mai lo tura hrilh an ni a. Duty-ten eirawng bawlna leh tui chawina tur tuikhur awmna thlengin an hrilh a ni. MZ01T1777 hi ningani tukthuan ei khamah a bungraw phurh unload tura godown pantir a ni.

2. Tlai lam dar 4 velah MZ01T1777 khaw chhuahsan tura lo tlan let chu supply motor a ni tih duty-ten an hriatsa avangin hrui an lo dahhniamsaksa a. Mahse, duty post a rawn tlan thlen hian speed sang taka motor khalhin, duty-te tana hlauhawm khawpa chakin a rawn tlan a. Duty post chhinchhiahna plastic parapads leh hrui zawng zawng chu hnuk darhin, thui tak a hnuh hnu-ah hruizen hi a chat ta a ni. Duty-te chuan ding turin an au a, ding lovin a tlan tlang zel a ni. Chutianga duty post em pawh zah derna nei lova lirthei khalh chu duty-te chuan tha taka zilhhau a tha e tiin an umzui nghal a. Duty post atanga km 4 vela hlaah umphak niin thil awmzia hrilh tuma chhuk tura an hrilh hnu paw’n motor atanga a chhuk duh loh avangin tharum hmanga kawngka hawnsak hial a ngai ta a. Duty post lamah lettir a ni a, a chet dan a mawi loh em avang leh duty-te a tham loh em avangin duty-te pawh an thinrim hle. Dan a bawhchhiatte hmanga pawisa chawitir tum a ni zet nain driver hian Rs 500 vel chauh a neih tawh thu a sawi a, pawisa pawh chawitir a ni ta lo va, fimkhur taka motor khalh tawh tura hrilhin duty-ten an kaltir a ni.

3. Hliam leh hmuh theih khawpa kut inthlakna engmah a awm lo va, tha te te-a thil sawipui theih a nih tak loh avanga duty-te an insum vek thei ta bik lo erawh pawi kan tiin VLTF chairman pawhin phone-in amah driver ngei biain ngaihdam a dil nghe nghe a ni.

4. Hetih lai hian Lalbiakdika’n MTDA lamah dawt hmanga a zualko hi tha lo kan tiin kan dem hle a. A dikna lam ringawt changchawia VLTF tihmualpho a tumna hi kan demin thu dik chanve pawh tling mang lo hmanga MTDA leh Zoram mipuite hmuha a zualko hi tha kan ti lo a, Hnahthial North - I VLTF hnenah hian thupa a chawi ngei kan phut tlat a ni.

5. MTDA chuan an member a nihna anga Lalbiakdika thlavang an hauhna hi awm kan tihpui rualin thu chiang hre hmasa se la chuan hetianga press release an siam erawh kan ring lo va, MTDA pawh thu dik chhui chhuaka thuchhuah siam tha leh turin kan ngen bawk e.

6. Sawrkar SOP angin Kawnpui-ah hian bungraw phur motor hi za chuang fe an lo ding tawh a, zan tam riak tawhte pawh an awm. Driver pakhatmahin harsatna an tawh loh laia chhuanlam dawrawm te te nena Lalbiakdika’n hetiang boruak a tawng hi amah inenfiah nan hmang se kan duh a. Zoram mipuite hriat a, tlawmngaia duty-te mualpho taka thu dik lo nena min hekna hi thleng nawn tawh lo se kan ti hle.

Duty-te hi mi famkim leh fing tak tak kan ni vek bik lo va, dai suala che mawi lo thei kan nih kan pawm a, khualzin leh bungraw phurte rilru lo tihnat tawh kan nei a nih chuan ngaihdam kan dil a ni. Chutih rualin eng pawh tawk ila, tute pawh thil hrechiang hmasa lova Social media lama chet zung zung hi i sim tawh ang u..

Hri laka kan him zel theih nan Hnahthial North I VLTF duty-te chu khauh takin kan kal zel dawn a ni.

VILLAGE LEVEL TASK FORCE : HNAHTHIAL NORTH I