Happy Mother's Day
—LH.Hauhèng, Nghilhloh Rûn
"Dear Mom, I may not like you always. We may have arguments and fights sometimes. But there's one thing that you should know i love you always and forever."
A țobul:
Nia, nute ni țobul hi nu chhulchhuak damlai tawh phawtte tana mellung pawimawh tak mai pakhat chu a va ni em. 1864 tomir thla, ni 12—a USA a piang; Anna Reeves Jarvis fanu Anna Maria Jarvis ina, kum 1905 kuma a nu duhtak maiina a boral san ta hriatreng nan a, 1907-a a nu thihcham alo thlena a țhian tha zualte sawm khawmin Mother's day serh hran a duh thu hi alo tlangau pui ta kha a ni a.
Chu chu hriain an lawina kohhran St. Andrew's Methodist Episcopal Church, West Virginia chuan, may 1908 chawlhni vawi hnihna chu 'Mother's Day' atan an hmang zui ta a ni. Tin, 1912-a General Methodist Conference, Minneopolis chuan Mother's day dintu ah, Anna Maria Jarvis chu khawvel pum hriatah a hming an puangchhuak ta bawk kha a ni a. Kum tinin may thla pathianni vawi hnihna apiang hi khawvel nute ni atan an lo serh hrang ta.
Nu te hi vawiinah hian an ropui zia leh an mahni tel lova khawvel a famkim theih loh zia te hi kan chhut ngai emaw chu, nu te avangin vawiin niah hian: Pastor, Politician, Officer, Zirtirtu, Doctor adt... te ni thei tura chher puitlingtu che kha i nu a ni asin. Zah hle ang che.
Tu'nge nu te chu:
Nu chu hmeichhia a ni a, pasal pawmlai nei emaw nau hring tawhna zawng hi nu chu an ni. Mahse, Pathianin a ruat dan ang nu nih tling erawh kan damchhung thawnthu atan mellung pawimawh tak a ni si a. Nu te tluka nu nihna hian nu te pawimawhna leh an hlutna hi a va pholang chiang em! Hmeichhe hrin tho nu te chhulchhuak nu ho te hi inzavai hian in lo hlu teh e.
Nepoleana khan, "Nu tel lo chuan khawvel hi thlaler ram ro, tui awm lohna hmun ang a ni" a lo tih te kha a dik a ni.
Nu hmangaihna thuk leh ril tak hi zawng, Nu chauhvin nu hmangaihna a hriat rengna hmunah hian a chiang ber mai awm asin.
An lo hlu ber:
Nu te hian an nunna hial thapin, thisen tam tak sengin min hring a, an mal chung leh awmte chu kan khum hmasa ber a ni a. Nu te tello chuan khawvel hi engmah lo mai a lo ni. Nu te hi leia kan hmuh maitheih pangpàr rimtui leh mawi ber ber te an lo ni.
Kan chenna khawvel hian, nu tam a hring chhuak ta. Mahse, nu nihna title phuru zo thei erawh an tampui lo vang. Nu te hi kan lei pathian, kan khawvel tinuamtu leh chhungkaw rangkachak, chhungkaw pangpar mawi leh tlo ber te an lo ni. An mahni avangin an fapa/fanu nih hi alo nuamin a lova hlu ngai em...
Zalênna saltangte khawnrik saktu US President, Abraham Lincoln khan,"Ka bat tlak dawn ila, ka nu laka ka bat hi ka tlak huphurh ber a ni" a lo ti a. A va ropui em. Nu te laka bat tlak turin tunge tling zo awm chuang ang ni?! Chumai a ni lo, Ingmar Bergmana'n a ni lawm ni kha, "Ka upat poh leh ka nu kha ka rilru-ah a lo lang zing țhin" titu kha ni. A va sawi dik em, kan upat poh leh nu te hi an lo hlu zual ting mai a lo nih hi...
Nu te hi kan khawvel leh kan mit hmuha missionary niin, Missionary ropui William Carey meuh pawhin, " Chhungkaw hlimna chahbi kawltu chu nu a ni" a lo ti a. Ni e, leilunga robawm chahbi kawltu atan nu te hi Lalpan a lo ruat hi a lo ni zawk si. Chhungkua hian nu aia rohlu dang a nei ngai dawn lova, a nei ngai hek lo vang.
Hei hi mahniah:
Chhiartu duhtak, hei hi ka zawt a che. I nu tan i hlutzia leh a khawvel i nihzia hriattir lovin i nu kha mual i liam tir mai dawn em ni? Nge i nu kha mi fate awtin i la siam zel zawk dawn? Kei zawngin ka nu hi mi fate awtin ka siam ngai dawn lo a, a thlamuanna ber nih ka tum ang.
Ka tun dinhmun min hlangkaitu, tawp lova min hmangaihtu, bang loa min țawngțai saktu ka nu min enkawlnaah hian ka lawm a ni. I nu in a hmangaih che ang bawkin a hlimna thlentu i ni ve em?! Nu te u, nangmahni avang chauhvin khawvel hi a nuam asin.
Vawiinah hian i nu aia nu hmelțha dang an lo awm lo va, i nu aia nu ropui an lo awm bawk hek lo. I nu kha i khawvel history hrilhtu che leh i vanram chahbi kawltirtu che kha a nia asin. Zah ang che.
Dam mawh hritlan ni khua te hian nu te u, inhlu zual a sin. Ram kal leh inchhung sekrek inkhawih hlan te, khuallam ram hla taka in zin te hian, nu te tluka fate'na kan ngaih leh thlakhlelh hi nang ni lo an awm chuang lo.
I nu hmangaih rawh:
Vawiinah hian keia min hringtu ka nu ngei pawh, kum 55 chuang niin tisa lama awngràwp tak chungin Pathian zarah minla dampui a, ka nu vawiinah hian ka hmangaih che a, ka'n chhungkaw tan nu rangkachak i ni asin. Nangmah avangin ka nu i fapa nih hi nuam ka ti tak zet. Rei tak min mit menpuiin min dampui reng ang che.
Nu te ni hmuchhuak tu, Anna Maria Jarvis chuan nu hmangaihna leh kan tana an inpekna te hre reng chunga nu te kan hmangaihna lantir ve țhin turin min duh asin.
Hnam changkang apiangin nu te hlutzia an hria a, nu te hnen ațangin hmangaihna tawpkhàwk an dawng țhin a, chutiang mite chuan nu te hlutna an tizual thin hi a lo ni. Nu te tluka ngaihsan leh han ngaih ropui filawr láwtlak tur hi leiah hian an lo awm chuang lo. Hmangaih phu leh zah phu ber chu nu te hi an lo ni.
I nu chu, eng ang mi pawh ni se,
"A damlai ngeiin i nu hmangaih rawh."
Post a Comment