𝖧𝖾𝗆𝗂 𝗍𝖾 𝗎𝗇𝖺𝗎 𝗂𝗇𝖿𝗎𝗂𝗁𝗇𝖺 𝗁𝗂 𝖺 𝗉𝖺 𝗋𝗂𝖺𝗎. 𝖬i𝗍𝗍𝗎𝗂 𝖺 𝗄𝗈 𝖻𝖺𝗐𝗄. 𝖢𝗈𝗏𝗂𝖽-19 𝗁𝗆𝖺𝗍a𝗐𝗇𝗀 𝗓𝖺𝗐𝗇𝗀 𝗓𝖺𝗐𝗇𝗀𝗍𝖾 𝗍𝖺̂𝗇 𝗄𝖺 𝗋𝖺𝗐𝗇 𝗌𝗁𝖺𝗋𝖾 𝖾. 𝖣𝗈𝖼𝗍𝗈𝗋, 𝖭𝗎𝗋𝗌𝖾, 𝖧𝖾𝖺𝗅𝗍𝗁 𝖶𝗈𝗋𝗄𝖾𝗋 𝗍𝖾 𝗅𝖾𝗁 𝖺𝗇 𝖼𝗁𝗁𝗎𝗇𝗀𝗍𝖾 𝗋𝗂𝗅𝗋𝗎 𝖺 𝗍𝗂𝗅𝖺𝗇𝗀 𝗍𝗁𝖾𝗂𝗂𝗇 𝗄𝖺 𝗁𝗋𝗂𝖺
Ka nau duhtak,
Kum 4 dâwn teh meuh midang tanpui theihna tûr leh i hmakhua tur atân tiin neih thing lung khâwng tak meuhin nurse i zir ve a. “Mamawh i neih phawt chu neih loh kan nei lo a nia” tih kha vawi engzat nge kan inhrilh tak ang aw! kan neih lohzia inhrilhna a ni lek fang tih i hrethiam si a!
Pathian a tha a, i zo ve ta mial a. Beiseina sâng tak nen kan thlir lai chein Covid-19 hri lêng chuan min nang ta si a, i chhungte chuan hetiang a ni dawn tih hria ilang chuan hemi ni lo zâwk; kawng dang kawhhmuh che kan duh hial maithei e! thih leh dam karah chutiang kan lo ti a nih pawhin tunge min dem chuang ang?
Nimahsela i naupan lai atanga i lo suangtuah thin ngeiah, hun thim tak khawvelin a tawh laia pindan lairil hmatâwnga hmeichhe awm nêm zawk i ding ta hi kawng eng emaw ti takin he chhungkua hi kan lawm a; chhungrila tha khur rû der der chung si hian a rûk tak chuan midang tân kan awm ve ta hi kan zahawm thar ta riau hian kan inhria asin!
“Midang tanpui thin te hi an hlu a, khawvela mi hausa ber an ni” tih thuvawna neitu, i pi atanga dawng ve tho i nih kha. Thih leh dam kara midang tâna thian chhan thih ngam pasaltha te hi khawvel hian a ngaisâng a; kan thinlungin ‘huai nopui’ a la dawmtir zelin ka ring. Chu chawimawina zahawm, mi huaisen te ta chu engmahin a lei pha ngai lo va, sum leh hmelhriat neih that vanga dawm theih lah a ni hek lo. Chutiang kalkawngah chuan i ding a, i hawikir lo vang tih pawh kan chiang!
Khai le, ka nau huaisen, kan Lalpa Isua tihdam rawngbâwl hna chhunzawmtu in nih kha; a tha thei ang berin damlote kha enkawl ang che. Indawm kun ngai lo la, beidawngte tan beiseina thlentu lo ni zawk ang che. Thim a chhah poh leh i tuang lo tichhah la, thim zingah pawh êng kan nei tih lo theihnghilh ngai lo vang che.
In thawhhonaah, “engati nge kei hlir” tia mahni inkhawngaihna sual a lo kal tik apiangin midangte chhâwk leh tanpui tura ‘tawlhlohpuan’ ka bân i nih kha aw. Tap rawh a pawi lo, i hahna te a chhawk ang; chak loh nân erawh i hmang tur a ni lo ve.
Sakhua, pâwl, chi leh vun rawng avânga inthliarna awm hauh lova natna tinrênga nâte enkawl in intiam tawh ang khân; Phawthira thinlung neitu khân i theihna sang ber i hlan tur a ni ang. Lo haw tur i awm ta lo a nih pawhin inchhuang takin, “midang tân a nun a hlan ve ta” tiin kan thlah ang che.
Hei erawh lo hria la: ‘I thiante, damdawi lama thawktute zawng zawng tân kohhranho kan ṭawngṭai’ tih hi. Lo zam hauh suh u. A tawp thlengin Phawthira aw. Aza aza fighting!
ZIAKTU -Zonunsanga (Tea)
Post a Comment