Lawngtlai 23.May,2021 : May ni 22, 2021 khan ZMC RT-PCR laboratory-ah COVID-19 positive 65 hmuhchhuah a ni a. TrueNAT laboratory-a sample test zingah COVID-19 positive 5 a awm bawk a, Rapid Antigen Test hmanga COVID-19 positive hmuhchhuah thar 144 an awm thung a ni. Covid-19 positive an hmuhchhuah thar zawng zawng hi 214 a ni.
Nimin khan sample test zawng zawng hi mi 3462 (mipa 1707, Hmeichhia 1755) a ni a, chung zingah chuan positive 214 hmuhchhuah thar an ni a. Sample an test atanga Positive hmuhchhuah zat hi 6.20% a ni. Tin, nimin vek khan positive enkawl lai mi 113 chu Covid-19 positive enkawlna hmun atanga chhuahtir an ni thung.
Tun dinhmun ah hian Mizoram-ah hian positive enkawl mek 2453 an awm mek a. Covid-19 avanga nunna chan mi 31 an awm thung. Hri a lo len atangin hri kai mi 10220 an awm a. Heng zinga mi 6348 hi mipa an ni a, hmeichhia 3872 an ni a. Dam taka chhuak hi 7736 an ni.
Mizoram a District 11 ah hri vei enkawl lai an awm vek a. Aizawl District ah 1947, Lunglei District 99, Siaha District 20, Champhai District 44, Kolasib District 128, Serchhip District 95, Lawngtlai District 51, Mamit District 20, Khawzawl District 9, Hnahthial District 1 leh Saitual District 39 -te enkawl mek an ni.
ZMC RT-PCR Laboratory hmanga positive hmuhchhuah zat hi 65 an ni a. Aizawl District vek an ni.
TrueNat khawl hmanga positive an hmuhchhuah hi panga (5) an ni a. Champhai District pahnih leh Lunglei District ah pathum.
Rapid Antigen Test hmanga hmuhchhuah hi 144 an ni a. Aizawl district ah 95, Lunglei District ah 15,Lawngtlai District 14,Serchhip ah 12, Siaha District ah 4, Mamit District ah 3, Kolasib District ah 3 leh Saitual District ah 1 te an ni
Positive an hmuhchhuah 214 zing ah hian Symptom nei 96 awmin Symptom nei lo 118 an awm thung ani.
Vanduaithlak takin Pi Tawktiali (63), Electric veng chu nimin 22.05.21 chawhnu dar 2:50 khan COVID Pneumonia avangin ZMC ah a boral. 11.05.21 khan hri a kai tih hmuhchhuah niin BSUP ah dah a ni a. 18.05.21 ah ZMC ah admit a ni. Amah hi asthma leh lung thalo neisa a ni.
Post a Comment