Defence Research and Development Organisation (DRDO) siamchhuah Covid-19 damdawi ei chi 2-DG chu nimin (17.05.2021) khan Defence Minister Rajnath Singh leh Health Minister Harsh Vardhan-te’ n an tlangzarh.
Tun thla tir khan Drugs Controller General of India (DGCI) chuan 2-deoxy D-glucose (2-DG) damdawi ho covid natna veite enkawlna atan loh theih loh huna hman theih turin phalna alo tichhuah tawh a. He damdawi hi ipteah (sachet) a phuta dah a ni a, tui nena chawhpawlh hnua ei mai theih a ni.
Defence Ministry chuan May ni 8 khan 2-DG damdawi enchhina atanga a lan danin damdawi ina awm Covid damlo ten an dam hma phah a, Oxygen tlakchhamna a tiziaawm thei niin an tarlang bawk. Anti Covid-19 2-DG damdawi hi DRDO laboratory tha ber Institute of Nuclear Medicine and Allied Sciences (INMAS)-ah Dr.Reddy’s Laboratories (DRL) nen Hyderabad-a an siamchhuah a ni.
Health Ministry chuan, Covid-19 hripui leng thawh hnihna vangin damlo tam takin Oxygen an tlakchham vangin damdawi Inah enkawl an ngaih phah a. He damdawi hian hrikin a tihbuai cell-te a dodal vangin nunna hlu tak tak a chhanhim thei dawn niin a lang a. Covid-19 damlote damdawi ina an awm hunchhung a tih tlem phah thei ang, a ti.
Rajnath Singh chuan Covid-19 damlote enkawlna kawl a eng phah dawn a, thiamna sang tak tak nei India ramin a nei tih a tilang chiang hle, a ti.
Hahchawla chau hman kan la ni rih lo a. Hripui leng thawh hnihna hi a tawp hun tur hriat theih a la ni lo a. Fimkhur tak, chak tak sia hmalak kan la ngai a. Medical Corps-in damlote enkawlna kawnga chak zawka hma a lak theihna tura doctor chawl tawhte hnathawk tura a ko let leh chu a lawmawm hle a. Service tawp tawh hnua hripui do tura rawn kir lehte chungah thinlung takin lawmthu ka sawi,” tiin DRDO Hqrs-a hun an hmannaah a tarlang bawk a ni..
Oxygen pekchhuah chungchang emaw ICU khum buatsaih chungchang emaw liquid oxygen phurkualna atana cryogenic tank ruahmanna siam chungchangah an sorkar chu an ti mai mai lo tiin a sawi a, Hripui dona kawnga sipaite inpeknaah lawmthu a sawi bawk.
Post a Comment