Lawngtlai May 21 : Nimin May 20 khan Bungtlang South kangmei tuartute tana vehbur an khawnsak tlingkhawm sumfai chu Zo Inspiration ten kangmei tuartu chhungkuate hnenah an hlan.
Nimina kangmei tuartute tanpuina sum hlanna hunah hian kangmei tuartu chhungkua 13 aiawhte kohkhawm an ni a, heng chhungkaw 13 te hnenah hian vehbur an khawnsak atanga tlingkhawm cheng nuai 3 leh sang 7 chu a zat theuhin an sem a ni.
Kangmei tuartute chuan Zo Inspiration chunga an lawmzia sawiin, hetianga Mizorama chhiat tawk chhungkua leh harsatna tawk mimal an tanpui thin hi mi tam tak tan malsawmna a ni an ti a, tanpuina pawisa an dawn chu a tangkai thei ang bera an hman tur thu an sawi bawk.
Zo Inspiration te hian chhungkua leh mimal anga harsatna tawk tanpui ngai ngawih ngawihte zawng chhuakin an tanpui thin a. Zo Inspiration neitupa Immanuel Thangrosanga chuan, mihring khawsak dan inchen loh avangin harsatna tawk thei theuh kan ni a, hetia kan mihring puite an harsatna zawna tanpui hi Pathian duhdan a ni a, hlawkna leh beisei nei miah lovin hetiang thil hi kan kalpui a, midangin malsawmna leh chan tha an chang kan hmuh hian kan lawm em em a ni a ti a. Mi an tanpuina tura pawisa thawh thin tu zawng zawng chungah lawmthu a sawi bawk a ni.
Immanuel Thangrosanga chuan hetianga chhungkaw emaw mimal emaw tanpui ngai ngawih ngawih an awm chuan in thlahrung lova hrilh hre thin tur leh a theih ang anga an chetchhuah tur thu Rauthla a hrilh bawk.
Post a Comment