English Premier League Club
Tottenham chuan thla 17 chuang an chhawr hnuah an Manager Jose Mourinho chu
vawiin khan an ban thu an puang.
Tottenham hian Mauricio
Pochetino thlak turin Premier League hrechiang tawh Chelsea leh Manchester
United manager hlui Jose Mourinho hi 20 November, 2019 khan an lalut a, beisei
a phak loh avangin ban a ni ta a ni.
Portuguese coach hian
Tottenham hi match 84 a enkawl hman a, match 44 chak puiin, vawi 23 a tlawmpui
tawh a, tun season-ah Premier League-ah point 50 hmu mekin pasarihnaah an awm
a, an beisei ber Champions League khel thei lo dinhmunah an ding mek bawk.
Tottenham chairman Daniel
Levy chuan, ‘Jose leh a coaching staff-te hian hun harsa takah min kaihruai a,
mi tha tak leh mahni hnaa rinawm tak a ni’ a ti. Jose Mourinho rual hian a
coaching staff Joao Sacramento, Nuno Santos, Carlos Lalin leh Giovanni Cerra pawh an
tel an ni.
Mourinho hian Spurs a
enkawl chhungin Champion League Round of 16 a thlenpui a, mahse RB Leipzig hneh
lova, UCL atang hian hnawhchhuah an ni. Tin, FA Cup ah Quarter-final lutin
Everton hneh lovin an tla bawk. Hei mai bakah hian Europa League atangin Round
of 16 ah tho Dinamo Zagreb hneh lovin an tla bawk.
The Special One inti ngat
thin Jose Mourinho hi coach chhia a ni lova, club a enkawl tantirh atangin
trophy hi 19 a chawi tawh a, mimal chawimawina phei chu 26 a dawng tawh a,
Guinness World Record-ah tum 5 a lang thei bawk a ni.
Tottenham hian kum 58 mi Mourinho thlak turin tunge an lakluh dawn an la sawi lova, tunah hian an academy coach Ryan Mason chuan training a neih puih a ni.
Post a Comment