Lai Autonmous District Council-a Executive Member i/c PHE etc leh Chawngte ‘P’ bialtu MDC nibawk Pu Andrew Laltlanzara chuan, vawiin hian a bial chhunga vawk vulh tute African Swine Fever avanga harsatna an tawh mek te thlamuan turin Chawngte a tlawh.
Pu Andrew-a chuan, a bial chhung a vawk vulh tute’n African Swine Fever avanga harsatna an tawk chu pawi a tih thu a sawi a. He vawk hri leng avanga an harsatna te chu a rang thei ang ber a, AH & Vety Department te hriattir zung zung zel turin a chah a. An manganna chu a hriatpui thu leh chhawmdawlna te pawh a theih chin chin ah ngaihtuah sak a tum thu a hrilh bawk a ni.
Pu Andrew-a chuan Chawngte CVO Dr.Khawla chu Department anga hmalak ngaihte, a tul ang leh a rang thei ang ber a hma la turin a ngen nghal a. Vawk vultute harsatna te pawh theihtawp chhuah a, lo tanpui turin a chah bawk a ni.
Tunlai Vawk pul hri leng mek ah hian Chawngte ‘P’ leh a chhehvel khua te pawh an mangang hle a. Tunah hian vawk 90 vel thi tawh niin an chhinchhiah bawk a ni. Hetianga an harsatna leh manganna te hriat a, bial mipuite ngaihven a, a hmun ngei a bialtu MDC in a tlawh chu Vawk vulhtute pawh an thla a muang hle a ni. Pu Andrew-a hi Pu Laltawnliana Chawngte ‘P’ VCP in a tawiawm a. Bialtu MDC hi Inrinni hian Lawngtlai a rawn let leh ang.
Post a Comment