Health Minister Dr. R Lalthangliana vawiina Lengpui tlawh chuan "Tun tum chu Covid hmasa ai khan Lengpui hi kan vanduai tlat mai a, Lengpuia kan Community Health Centre bulah hian Covid dahna kan neih hi 8 chauh a ni,” a ti a.
Building hran mah nise, Damdawiin kalte tan a tihbaiawm a. 4C hming thar kan vuah a, Task Force-te enkawl turin Covid vei dahna atan Govt. Middle School-1 remchang insiamsak thei hi lawmawm ka ti hle a ni,” a ti a.
Nikum kha chuan Lockdown kan puanin Covid kan kiam deuh a, tunah hi chuan kan Lockdown vangin Covid chain hi kan chhu chat mai rih lo," a ti bawk.
Health Minister hi bialtu MLA Er.H.Lalzirliana’n a tawiawm a. "Covid-19 hi beisei loh ang takin India ram leh Mizoramah a hluar chho hle a. Keini Lengpui hi zin veivakte lo luhna ber a nih avangin a tuar berte zingah telin kan inkharkhip hial a ni,” a ti a.
“Covid hi mithiamte sawi dan chuan May thla hi a vanglai a ni chho dawn an la ti chauh mai a, inbuatsaihna tha tak nena hmachhawn hi kan tihtur chu a ni," a ti bawk.
Health Minister hian Lengpui Task Force-te hi PPE hmanraw hrang hrang, face mask, hand sanitiser leh sum fai thahnem tak a pe a, Er.H.Lalzirliana pawh hian Task Force-te hi sum faiin a tanpui bawk.
Health Minister chuan Lengpui Airport chu tlawh nghalin, "Lengpui Airport hi kan fimkhur tawh em em a, Thlawhnaa lo haw apiangte uluk takin Ragt Test kan nei zel a, an result negative mahse, ni 7 chhung kan khunghrang a. Chumi hnuah RT-PCR kan ti leh a, chuta negative chauhte chu kan inchhuah zalen a ni. Thawh hnihna Covid hi a danglam a, thalai pawh a zuah lo a, kan fimkhur tlan hle a ngai a ni," a ti bawk.
Post a Comment