Myanmar sipai hotupa ber Min Aung Hlaing chu an ram aiawh turin Association of South East Asian Nations (ASEAN) summit Indonesia khawpui Jakarta-a neih turah a tel dawn.
February ni 1-a mipui rorelna an hnehchhuh hnua a vawikhatna ni turin Myanmar sipai hotupa ber Min Aung Hlaing chu an ram aiawh turin Indonesia khawpui Jakarta-a ASEAN Summit neihna turah a tel dawn ta a. He summit ah hi ram dangten Myanmar ram buaina tireh tura hma an lakna hmasa ber tur a ni dawn a. He hunah hian member 10 awmna Association of South East Asian Nationa (ASEAN)-a ram hruaitute an tel ang.
ASEAN member-te zingah summit neih duh leh duh lo an awm a. Myanmar buaina chungchanga inrawlh duh leh duh lo an ni hlawm. Chinna ram hnaih lama awm hovin inrawlh an duh lova, a hlat ho zawngin an duh thung a ni.
Thailand Prime Minister leh Philippines President-te chuan an aiawh turin an Foreign Minister-te an tirh tur thu an puang fel tawh a. Anni ram bakah Malaysia, Singapore, Vietnam, Brunei, Cambodia, Indonesia leh Myanmar-te tun tum Summit ah hian an tel dawn a ni.
Myanmar ram hi ASEAN atanga ban duh tam tak an awm a, mahse, member-te hi ramdang tualchhung inrelbawlna-ah an inrawlh ngai lem lo a ni.
He summit ah hian UN Special envoy for Myanmar, Christine Schraner Burgener chu summit karlaka meeting pawimawh nei turin a kal ve ang.
Post a Comment