India ram chu Covid-19 vaccine vbch 13 pe chhuak rang ber

 India chu khawvela Covid-19 vaccine dose vaibelchhe 13 pe chhuak rang ber anih thu Union Health Ministry chuan nimin khan a sawi.

United states chuan hetiang zat dose pe tur hian ni 101 lai a hmang a, China-in ni 109 a hmang bawk niin ministry chuan a sawi. Hetih lai hian India-ah chuan nimin zing dar 7:00 thleng khan dose 13,01,19,310 pek chhuah tawh a ni a, hei hi tum (session) 19,01,413 neiha pek chhuah a ni.

Invenna damdawi hi damdawi ina thawk (healthcare worker) 92,01,728 hnenah dose khatna pek tawh a ni a, an zinga mi 58,17,262 chuan dose hnihna nen an dawng tawh a. Hri leng beihnaa hmatawnga thawk (frontline worker) 1,15,62,535-ten dose khatna an dawng tawh a, an zinga mi 58,55,821 chuan dose kimin an dawng tawh bawk a ni.

Kum 60 chung lam mi 4,73,55,942-in dose khatna dawng tawhin mi 53,04,679-in dose kimin an dawng tawh a. Kum 45 leh 60 inkar mi 4,35,25,687-in dose khatna dawngin mi 14,95,656-in dose hnihna an dawng tawh a ni.

State pariat - Maharastra, Rajasthan, Uttar Pradesh, Gujarat, West Bengal, Karnataka, Madhya Pradesh leh Kerala chu pek tawh zawng zawng zigna 59.25% hautu an ni tih ministry chuan a sawi bawk.