Champhai nula chhuanawm

 

Covid-19 vei enkawl lai, CT.Ram-nunmawii (CT-i) Ruantlang, Champhai chu hripui vei ve tho pitar kum 93 mi awmpuia enkawl turin a inpe.

CT-i hi Delhi-a LLB zirlai a ni a, April 6 khan a rawn haw a. A rawn haw hian Lengpui Airport-ah RAgT hmangin sample endik a ni a, a negative a. April ni 8-ah RT-PCR in a sample test leh a nia, a negative leh a, symptom a neih avangin April ni 10-ah test nawn leh a ni a, a positive tih hmuhchhuah a lo ni ta a ni.

Durtlang BSUP CCC-a enkawl a ni a. April ni 20 khan sample test leh hun tur  a ni a, a negative chuan CCC hi chhuahsan tawh tur a ni. CCC-a a awm lai hian pitar Kum 93 mi April 19 khan rawn dah luh ve a ni a, a chak lo hle a, enkawltu a mamawh tih a hriat avangin, thuneitute phalin a enkawl zui ta a ni. Hetiang anih avang hian April 19 khan SRH-ZMC-ah sawn phei an ni a, a sample pawh test nawn a ni ta rih lo a ni.

CT-i chuan, ‘Ka pi amah a tar ve tawh nen, BSUP-a an dah chhan pawh hrethiam thei lo in haw a ngen a. Ka lainat em a, amah awmtir chi a ni lo tih ka hria a, enkawl turin ka inpe ta a ni,” a ti.