New Covid-19 variants inkaichhawn awlsam zawk leh vaccine leh antibody protection tihniam thei chu khawvel ram hrang hrangah a darh tawh a, Mizoram-ah pawh Covid-19 hri thar hi a darh tawh niin Doctor rual ten an ngai.
Mizorama Covid-19 hri kai te sample chu National Institute of Biomedical Genomics (NIBMG), West Bengal ah thawn thin an ni a, tun thlengin he laboratory-a Mizoram atanga sample thawnah hian Covid-19 hri kai thar hmuh a la ni lo.
Hetihlai hian vawiina Mizoram Doctor pawl hrang hrang aiawh thukhawm erawhin tunhnaia Mizorama hri leng inkaidarhna a thlen chak dan leh mihring taksaa a thawh nat dan thlirin, Covid-19 chi thar chu Mizoram-ah a lo lut tawh ngei ah an ngai a, laboratory proof awm loh mah se Clinically proof awmah an ngai.
Covid-19 variant thar hi a hmaa Covid-19 hrileng aiin zaa 70% a inkaichhawn a awl a, a ziarang diktak hi mithiamte’n an la hre kim thei lo a ni. Mizoram-ah Covid-19 hri thar a darh tawh nia ngaih anih avang hian Doctor rualte chu an hlauthawng hle a, mi tin fimkhur hle turin an chah a, Mizoramin dinhmun tha lo zawk a hmachhawn loh nan tute pawh fimkhur zual hle turin an ngen bawk a ni.
Post a Comment