COVID 19 VANGIN DELHI HOSPITAL TEN DARKAR 8-12 CHHUNG DAIH BAK OXYGEN AN NEI TAWH LO
- Manish Sisodia
APRIL 21, 2020 WEDNESDAY :
COVID-19 thawh hnihnain national capital Delhi khawpui chu nasa taka a tuam avang leh dam lo enkawl ngai an pun zel avangin Delhi sorkar chuan nimin Thawhlehni tlai ațang khan coronavirus dam lo te enkawlna tur Delhi chhunga hospital te chuan medical oxygen tlachham mai thei dinhmunah an ding tih thu Deputy Chief Minister Manish Sisodiya chuan sawiin, Delhi chhunga sorkar leh private hospital te chu darkar 8 - 12 chhung daih tur bak oxygen an neih tawh loh thu a sawi. Hospital lian, Max Hospital leh Sir Ganga Ram Hospital te meuh pawh oxygen tlachham mai thei dinhmunah an awm bawk.
“Central hnenah Delhi hnena oxygen pek țhin (quata) tipung turin kan ngen tawh a, Thawhlehni zingah tam tawk tak kan hmu hman lo anih chuan a manganthlak hle ang a, mipui an lungawi loin an thinrim au thawm a nasa hle ang," tih thu twitter kal tlangin a sawi.
_Tukin thlenga Delhi COVID-19 dinhmun chu hri kai thar 28,395 an awm a, hri kai thar hmuh chhuah tam ber ni a ni. Mi 277 thih belh an awm a, thi zat 12,638 an tling tawh a, hri vei mek 85,575 an awm a, dam tawh 8,07,328 an awm a, hri zat 9,05,541 a ni_.
Chief Minister Arvind Kejriwal pawhin Centre hnenah Delhi-in oxygen mamawhna leh indaih lohna nasa tak a neih thu a thlen bawk. “Hospital țhenkhat chuan darkar rei lo te daih chauh oxygen an kawl tawh a ni,” tih thu Sunday khan ziakin a thlen a, Kejriwal hian Central chuan Delhi oxygen quota tur chu state țhenkhat tan pawhpen sakah a puh bawk a ni.
Delhi High Court chuan kat hmasa Thawhlehni khan Central sorkar chu khakin national capital chhungah dam lo enkawlna tura mamawhna a nasat vang lai taka eng vanga industry te oxygen hman tura April 22 thleng nghak anih tih a zawt a ni. “Industry te hian an nghak thei a, dam lo te erawh chuan an thei lo. Derthawng takin mihring nunna chu a awm mek a ni,” court chuan a ti.
High Court bench chuan Central hnenah industry te oxygen hman khap lailawkna siam vat turin a ti a, “muan luat avangin nunna hlu tak hloh theih a ni”.
Delhi High Court bench hian the Central sorkar hnenah steel plant ten oxygen an siam chhuah chu sorkar-in a leisak turin a dil em tih a zawt bawk. “Steel leh petroleum industry te hi chin lem nei loa duham leh hmang ral buan buan an ni a – chuvang chuan oxygen an siam chhuah tam ang bawkin an hman pawh a tam a ni. Mi an thih zel miau si chuan ei bar zawnna leh ram tana thawh chhuah (economy) hian awmzia eng nge a neih chuan ang le", Justice Sanghi chuan Live Law hnenah a sawi a ni.
Tun dinhmuna oxygen indaih lohna leh mamawhna sang chho thut hi COVID-19 thawh hnihna rawn thawk leh hi hriatthiam phak rual loha a rawn nasat vang a ni. Nitin hri kai thar, dam lo leh thi an tam chhoh tak em avangin ram chhung hriselna lam enkawlna chuan dawl zawh chi rual a nih tak loh avangin healthcare system chu a tlu sawp titih der tawh a ni.
Ram chhung state tam takin COVID-19 dam lo țhahnem tham tak enkawl thar tur an awm leh tak avangin hospital te chuan oxygen an nghei a, țhenkhat tlachham mai theiin an awm a ni. Covid-19 dam lo hospital enkawl ngai te hi dam lo dang ang lo takin thawk harsatna, lung leh thin a khawih tlat avangin an nunna chhan turin oxygen an mamawh thuai țhin.
Ni rei vak lo kal ta ațang khan India chuan ram puma oxygen siam chhuah chu nasa takin a tipung a, Central sorkar chuan medical atan hman a țul vangin industry te hnena hralh chhuah a khap bawk a ni. Hei bakah hian ram pawn ațangin 50,000 metric tonnes chu medical oxygen atan lakluh tura tih a nih bakah ram chhunga siam chhuah pawh a leta an siam chhuah tipung tura tih a ni bawk.
HEI VE THUNG HI
Delhi khawpui meuh pawhin COVID-19 vangin harsatna a tawkin a khur anih chuan North East state ho hi COVID-19 thawh hnihna hian na taka a nuai theih reng dinhmun hlauhawmah kan ding vek a. Kan healhcare system leh facilities te pachhiat leh dawrawm dan ngaihtuahin hri kai tam hi kan cho lo a, cho chi rual a ni lo tak meuh a ni.
Sorkar-in COVID-19 hri darh lohna tura inkhuahkhirhna dan thar a duan hi kan him tlanna tur a ni. Tun țum zet chu kan sorkar pawhin a ngai pawimawh a, hma lakna a phawk chhahin a ti mai mai lo hle a, mipui lam pawhin kan tih mai mai a thiang lo. Vin leh khawng taka inkaihhruaina lek kawh hi himna a ni.
He natna hrik hi bawm chhungah khung leh up hlum ngawt theih a ni lo a, a kai thei mihring zawk hri kai lo tura kan inkhung leh in upbeh a ngai zawk a. Chuvangin, Sorkar hmalakna hi kan him tlanna tur a ni a,ngaihzam mai mai a hun lo tak zet a ni.
Nang, i chhungkua a lo himna turin chhuanlam fahrah te te hmangin pawnah chhuah loh hi kan hna pawimawh tak a ni e.
_Stay safe and healthy, obeying SOP'S__.
Source : Scroll In
Post a Comment