Nimin khan Lai Autonomous District Council Day 49-na chu Chief Executive Member Pu Manghmunga Chinzah, Office Chamber ah Office holder leh MDC te nen hman a ni a. Pu Manghmunga Chinzah CEM chuan, hripui leng avangin Lai Hnam in District Council kan nieh ni vantlang huapa hun kan hmang thei lo chu pawi a tih thu a sawi.
Pu Manghmunga Chinzah chuan, mahni ro in-rel ve theihna tur leh Autonomous District Council kan neih theihna tur a nasa taka tha leh ngaihtuahna senga lo thawk tu zawng zawngte LADC Day vawi 49-na ah hian kan hre renga zahna chibai kan buk a ni, a ti a. Kan Autonomy a him zel theihna tura leh hma lam pan a lungrual taka ke kan pen ho zel a ngai a. Chutiang tur chuan Lairam mipuite, Kohhran leh NGO te chu kawng hrang hrang a thawhpui a, tawngtai sak fo turin a ngen a ni.
CEM Pu Manghmunga chuan, India sorkarin kan hnam a lo than chhoh zel theih nana Autonomous District Council min pek hi hre reng ila, rintlak leh rinawm takin ram leh hnam tan thawk ila. Kan Culture leh identity te hi hnam kan nihna ti langtu anih tlat avangin, kan hnam lam leh kan tawngte tih hmasawn kawngah kan tanrual a ngai hle ani, a ti bawk a. Tunlai thangtharte hian Lairam hi ‘Keima ta’ a ni tih hre thar leh ila, kan ram leh hnam tan hian eng nge kan tih ve, tih ngaihtuahna nen hmalam pan zel turin thalaite a sawm bawk a ni.
Pu Manghmunga chuan, kan hriat theuh angin Covid-19 hripui leng chuan hmasawnna tura hmalakna te pawh nasa takin a ti thuanawp a. Kuminah pawh he hripui hian Mipuite ei leh bar zawn kawngah nasa takin a nghawng mek zel a. He hripui avanga harsatna tawkte pawh LADC-in phak ang tawkin chhawmdawl hna-te a thawk ve mek zel a. Sorkarin he hripui laka kan him theihna tura inkaihhruaina dan a siamte tha tak a zawm theuh ila. Tin, tunlaiin vanduaithlak takin kangmei a chhuak nasain kan district chhung ngeiah pawh mi engemaw zatin in leh lo te an chan a,he thil thleng hi LADC chuan pawi a ti in, kangmei tuarte kan tuarpui tak zet zet a. LADC chuan kangmei tuarte leh chhawmdawl ngaite a hmun ngeiahte tlawhin tanpuina engemaw zat a sem chhuak a. Hemi kawngah hian LADC chuan a theih chinchinah tanpui ngaite leh chhawmdawl ngaite tanpui hna hi a thawk zel dawn a ni, a ti bawk.
Kum 2022 hi Lai Autonomous District Council Golden Jubilee ani a. Hemi atan pawh hian a bul tanna atan budget ah pawh sum an dah thu a sawi lang a. Kumin LADC day ah hian sorkar hnathawk zawng zawngte pawh rinawm leh taima taka hnathawk zel turin a chah bawk a ni.
Post a Comment