Nimin zing khan Assam hmarlam district chu lirnghingin tum engemawzat a sawi a, chenna in thahnem tak chhe mahse mihring thi leh hliam na an awm thu hriat a ni hrih lo.
Lirnghing hi a hmasa berah zing dar 7:51 khan thlengin rictcher scale 6.4 a na in a thawk a, Sonitpur district chhung, Tezpur atanga khawtlanglam 43 km chu epicentre niin Regional Meteorological Centre chuan an tarlang. A hnuah lirnghing hi hriat chhunzawm a ni leh a, dar 8:03 khan 4.7 a na in a thawk a, dar 8:13 khan 4 a na leh dar 8:44 ah 3.6 magnitude a na in a thawk zui. Hemi hnu dar 10:05 khan Nagaon district-ah 3.2 magnitude leh dar 10:39 ah Tezpur chu 3.4 magnitude in a sawi leh bawk.
Lirnghing hi hmarchhak state engemawzatah hriat a ni a, an state thenawm Meghalaya leh Arunachal Pradesh-ah te a na zual. Hei bakah West Bengal thlengin hriat a ni a, mipuite chu inchhung atangin pawn lamah an tlanchhuak hlawm a ni. Hetih lai hian lirnghing vang hian hliam na emaw, mihring thihna emaw hriat a ni lova, a sawi hmasak ber tum hian in chhung atanga in saseng tuma tlan chhuak mi thenkhat erawhin hliam tenau an nei niin tarlan a ni.
Assam khawpui lian deuh deuh Tezpur, Nagaon, Guwahati, Mangaldoi, Dhekiajuli leh Morigaon-ah te chuan chenna in engemawzat a chhia a, Guwahati khawpuia chief minister chenna, secretariat-a ‘Janata Bhawan’ complex-ah pawh building thenkhat a chhe bawk.
Lir a nghin hnu hian prime minister Narendra Modi chuan Twitter kaltlangin mipuite a ngaihven thu leh a tul ang angin centralin a puih tur thu a tarlang a, union home minister Amit Shah pawhin Assam chief minister Sarbananda Sonowal chu biain Assam mipuite lamah central a dinthu a hrilh. Hetih lai hian Congress leader Priyanka Gandhi Vadra chuan lirnghing vanga Assam mite tawrhna chu an \awmpui thu a sawi ve bawk.
Post a Comment