July 10, 2024 (Rauthla) : Ni nga chhung awh tur LADC Emergency Session chu vawiin khan LADC Chairman Pu VL. Hmuaka kaihhruaina hnuaiah neih chhunzawm a ni.
Vawiin session-ah hian Pu CL. Lianzuala, Deputy Chairman LADC in Dt. 8.7.2024 Session tan niah banna (Resignation) a submit avangin Deputy Chairman thar thlanna neih a ni a. Deputy Chairman LADC Nomination file hun hawn chhungin, Pu H. Lalmuansanga, MDC, Tuithumhnar Constituency atanga thlan tlin chauhin, Nomination a file avangin, Pu VL. Hmuaka, Chairman, Lai Autonomous District Council chuan Pu H. Lalmuansanga chu tlingah a puang a ni.
Pu C. Lalmuanthanga, CEM LADC chuan, lawmpuina leh duhsakna thu sawiin, Pu H. Lalmuansanga, MDC chu mithiam leh a ngaihna hria, inzirmi tak a ni a, he house kaihruaina kawngah pawh felfai takin min kaihruai theiin ka ringa, a thlamuan thlak tak zet a ni, a ti.
Pu H. Lalmuansanga, Deputy Chairman chuan, He house zahawm takah hian, he hna zahawm leh chanvo pawimawh tak chelh tura kan hotu te'n min thlang hi ka lawm em em rualin a huphurhawm hle bawk a, tihsual palh thei kan ni a, chuvangin ka thawhpui member zawng zawng te'n, min finchhuaha thurawn min pe thin turin ka ngen duh bawk che u a ni, kan ram leh hnam tan hian rinawm tak leh taima takin rorel ila, kan dan neihte zahthiam takin, dan hnuaiah ro i relho thin ang u, a tawp berah chuan, he dinhmun ka thlen theihna tur min thlang tlingtu, Tuithumhnar Constituency mipuite chungah pawh ka lawm tak zet a ni, a ti.
Post a Comment