June 3, 2024 (Rauthla) : AMC Ward No. XIX by election-a ZPM candidate atan Dr. C. Malsawmtluangi ruat a ni.
AMC Ward No. XIX by election atana an candidate tur puanna hun hi vawiin khan ZPM General Headquarter chuan party office-ah an hmang a. Hun kaihruaitu Pu Lalliansawta, President chuan “AMC Ward XIX by election atan kan hruaitute chuan Candidate thlan chungchangah fimkhur leh uluk takin hma an la a, Candidate pawh an thlang uluk em em a ni. Chutih lai chuan Candidate tha tak mai kan nei hi kan lawm em em a, kan hotute thawhrimna kan chhuangin kan lawm hle a ni,”a ti.
Dr. C. Malsawmtluangi, AMC Ward No. XIX ZPM official Candidate chuan, “Ram leh hnam tana ke pen ve thei tura mawhphurhna ropui tak mai ka chang hi ka lawm em em a, he dinhmun ropui tak mai hi ka luah theih nan bial chhung mipuite thawhpuiah ka sawm duh che u a, kan ram siam tha tur hian mimal mai chuan tih theih ka nei lo, kan zavaia kan tan rual a ngai a ni,”a ti bawk.
Dr. C. Malsawmtluangi hi Pu C. Lalhmingliana leh Pi Zahmingthangi te fa 4 zinga a naupang ber niin ni 8 May, 1979 khan Aizawl Civil Hospitalah a piang a, kum 2006 ah Pu Lalmuanawma nen inneiin fa 3 an nei a, tunah hian an chhungkuain Hlimen Vengthlangah an khawsa mek a ni. Dr. C. Malsawmtluangi hi lehkha thiam thei tak a ni a, kum 2011 khan NEHU Department of Zoology hnuaiah Ph.D degree a zo a, a thesis chu “The Helminth Faunal Spectrum of Rodent hosts from Bamboo Growing areas in Mizoram, North East India”a ni. A thiamna avang hian Mizoram mai bakah India ram hmun hrang hrangah paper presentation a nei thin a, kum 2014-2016 chhung khan Department of Science and Technology, Govenrment of India hnuaiah Women Scientist (WOS-A) in a thawk a. Kum 2018-2021 chhung khan National Mission on Himalayan Studies (NMHS) GBPNIHESD under Himalayan Fellowship-ah Research Associate hna a thawk bawk.
AMC Ward No XIX Corporator, Baryl Vanneihsangi Tlau chu kum 2023 General Election-ah Aizawl South III bialah thlan tlin a nih tak avangin AMC Ward No XIX chu a ruak ta a, a aiawhtur hi thlan a ngai ta a ni.
Corporator inthlanna hi June ni 25, 2024 dar 7:00 AM - 5:00 PM chhung neih a ni ang.
Post a Comment