June 15, 2024 (Rauthla) : Lawngtlai Chandmary MDC bial by-election lo awm tur atan Pu F. Hrangtukhuma chu ZPM party official candidate atan ruat a ni.
ZPM Lai Dist Hqtrs Lawngtlai chuan vawiin khan an party office, Lawngtlai Bazarah Lawngtlai Chandmary MDC bial By-election candidate puanna inkhawm tawi an buatsaih a, Pu SL. Ngursailova Sailo, PAC member & Secretary, ZPM Election Committee chuan Lawngtlai Chandmary MDC bial by-election lo awm tur atan Pu F. Hrangtukhuma chu ZPM party official candidate a nih thu a puang.
Pu F. Hrangtukhuma chuan, inthlan kan hmachhawn mai dawn a, a hun hnai ta hle mai. He hun tawite chhungah hian party mite theihtawp min chhuahpui tur leh ticket beisei a, chang ta lo te pawhin rilru ngaihtuahna thar nei a, theihtawp chhuahpui a, hma lakpui zel turin a sawm bawk a ni.
Pu H.Chhawntluanga, Gen.Secretary, Gen.Hqrs Aizawl chuan, kan hma lawkah MDC By Election lo awm turah hian hnehna kan chan ngei theihna turin pheikhai rual taka ke kan pen a ngai dawn a ni, a ti a. Lawngtlai Chandmary By-Election lo awm turah hian hnehna chan ngei kan duh a, chumi tur chuan Gen. Hqrs lam atang pawhin kan hruaitute'n theihtawp an chhuah dawn a. Hemi kawngah hian Lai District a ZPM te rilru inhawng taka kan lo in ruahman a ngai bawk ang. Tunah hian kan party aiawh tur kan thlannaah hian mi tha tak tak ten ticket hi an beisei a, han paih tur chuang bik hi an awm lo a ni. Kawng hrang hrangin an dinhmun kan zir chiang a, kan rilru pawh a buai hle. Mahse, pakhat chauh thlan a ngaih avangin thutlukna siam a ngai ta a. Party tana thahnemngai taka lo thawk a, ticket beisei zinga lo chang ta lo te pawhin rilru na lova, kan aiawh tur kan thlan chhuah hi theihtawp lo chhuahpui zel turin kan sawm tak zet a che u, a ti a. Kan party candidate te party chhungkua atanga tih tlak tuma hma lo la an awm anih chuan party pawhin a ngai thu tak hle dawn a, chuvangin tling ngei tura theihtawp lo chhuah zel turin ZPM member te a sawm bawk a ni.
Candidate puanna inkhawm tawi hi Pu H. Lungrualkima, Treasurer chuan kaihruaiin, Rev. Lalsawmliana Sailo, UPC (NEI) chuan hunserh a hmang a. Pu H. Chhawntluanga, GS, ZPM Gen. Hqtrs chuan report tawi pein, Pu MC. Lalramchhana, President ZPM Lai Dist Hqtrs Lawngtlai chuan lawmthu sawina in hun a khar.
LADC 12-Lawngtlai Chandmary MDC constituency hi Dr. Lorrain Lalpekliana Chinzah, Adviser to Chief Minister (H&FW & Agri.) MDC bial ni ṭhin in, kum 2023 MLA inthlanah khan Lawngtlai East MLA atana thlan tlin a nih avangin Dr. Lorrain-a chuan MDC a nihna aṭang banna a lo thehluh tawh a. Chandmary MDC bial chu bial ruak, inthlan ṭhat ngai a lo ni ta a ni.
State Election Commission chuan Lawngtlai Chandmary MDC bial by-election hun atan Dt. 27th June, 2024 a lo ruat tawh a. Tun dinhmunah voters 2890 an awm mek a ni.
Post a Comment