Lawngtlai 05.06.2024 : Lai Autonomous District Council (LADC) hnuaia 12-Lawngtlai Chandmary MDC biala by-election buatsaih tur atana hman tur final electoral roll chu vawiin khan Lawngtlai District Election Officer Pu Cheemala Siva Gopal Reddy chuan Lawngtlai DC Conference Hall-ah a tlangzarh.
Lawngtlai DEO Pu Cheemala Siva Gopal Reddy chuan Lok Sabha Inthlanpui, 2024-a vote tlate tluang taka chhiar zawh a nih theih nana official, political party, tlawmngai pawl leh chanchinbu mite thawhpuinaah lawm thu a sawi a. VC Inthlanpui leh MDC by-election buatsaih tur hmabak la awmah pawh an thawhpuina azarah inthlan thianghlim, felfai leh muanawm tak buatsaih a nih leh theih ngei a beisei thu a sawi.
He hunah hian Election Officer Pu Denny Lalchhuanawma chuan MDC by-election buatsaih tur atana electoral roll siam ṭhatna kalpui dan leh final electoral roll dinhmun tlangpui a tar lang a. Hemi hnu hian final electoral roll chu DEO Pu Cheemala Siva Gopal Reddy leh Electoral Registration Officer/SDO(Sadar) Pi Margaret J. Vanlalremmawii te chuan political party ai awhte hnenah an hlan nghal a ni.
He hunah hian election official-te, Lawngtlai Chandmary MDC bial chhunga Designated Officer (DO)-te leh political party ai awhte an kal khawm a ni.
12-Lawngtlai Chandmary MDC Constituency chhungah hian polling station pali awmin, final electoral roll-ah voter 2,890 (mipa 1,366 leh hmeichhia 1,524) an awm a. May ni 14, 2024-a tihchhuah draft electoral roll aṭangin voter 67 (mipa 26 leh hmeichhia 41)-in an pung a, voter punna hi 2.38% (mipa 1.94% leh hmeichhia 2.78%) a ni.
Final electoral roll aṭanga a lan danin, Lawngtlai Chandmary MDC bial chhunga polling station pali awm zingah 12/2-Chandmary North-II Polling Station-ah voter tam berin, voter 829 (mipa 415 leh hmeichhia 414) an awm a. 12/1-Chandmary North-I Polling Station-in dawtin, voter 826 (mipa 374 leh hmeichhia 452) an awm thung a. 12/4-Chandmary South-II Polling Station-ah voter 690 (mipa 315 leh hmeichhia 375) awmin, 12/3-Chandmary South-I Polling Station-ah voter 545 (mipa 262 leh hmeichhia 283) an awm bawk.
LADC-ah hian Member of District Council (MDC) bial 25 awmin, LADC MDC Inthlanpui 2020-ah khan Lawngtlai Chandmary bial aṭang hian Dr Lorrain Lalpekliana Chinzah chu thlan tlin a ni a. MLA Inthlanpui 2023-a Lawngtlai East biala MLA atana thlan tlin a nih tak avangin Dr Lorrain Lalpekliana Chinzah hian MDC nihna chu bansanin, Lawngtlai Chandmary bialah hian MDC by-election buatsaih a ṭul ta a ni.
Post a Comment