Lawngtlai 27.03.2024 :  Vawiin khan Lawngtlai District Level Committee on Child Death Review (CDR) leh Maternal Death Review (MDR) chu an chairman, Lawngtlai District Bawrhsap Pu Cheemala Siva Gopal Reddy hovin a office chamber-ah an ṭhu khawm a. Kum 2023-2024 chhunga Lawngtlai District-a naupang thihna leh nau chunga nu thihna thlen dan thlir hovin, chuti ang thihna a thlen loh nana hma lak dan tur an sawi ho.

Chairman Pu Cheemala Siva Gopal Reddy chuan Lawngtlai District chhunga hriselna kaihhnawiha thawktute inpekna leh thawh rimna chu fakawm a tih thu sawiin, an hlawhtlinna lawmawm a tih thu a sawi a. Chutih rualin, Lawngtlai District-in hriselna kawngah hmasawnna tur a la ngah hle tih sawiin, harsatna hrang hrang karah theih tawp chhuah chhunzawm zel turin a chah a ni.

He hunah hian Lawngtlai District Deputy Chief Medical Officer Dr S. Thaizi chuan kum 2023-2024 chhunga Lawngtlai District-a naupang kum 5 hnuai lam thihna leh nau chunga nu thihna thlengte tar langin, a chhan leh vang nia lang te a sawi fiah a. Report-a a lan danin, kum 2023-2024 chhungin Lawngtlai District chhunga mi naupang kum 5 hnuai lam thi 23 awmin, an zinga 20 chu nausen kum 1 hnuai lam an ni a. Hemi chhung hian nau chunga nu thihna ṭum 5 a thleng bawk. 

He'ng thihnate hi vanduaina vang a nih piah lamah, ṭhenkhat chu an damloh veleha damdawi in panpui vat loh vang te, damdawi in panna kawnga harsatna awm vang te, duhthusama damdawi in changtlun tawk loh vang te, nau pai laia inenkawl ṭhat tawk loh vang te ni bawka a lan thu sawi lan a ni a. He'ng harsatna hrang hrang avanga thihna a thlen tawh loh nan nu leh pate'n fate damlo a rang lama damdawi in panpui nachang hriat a pawimawh thu te, nau pai laia inenkawl ṭhat leh damdawi in ngeia nau neih a pawimawh thu te, thawktu leh hmanruaah Lawngtlai District tihchangtlun lehzual a pawimawh thu te tar lan a ni a. Hriselna kawnga Lawngtlai District-in hma a sawn theihna tur rawtna leh hma lakna tur hrang hrangte sawi ho a ni bawk.

Post a Comment

Powered by Blogger.