Aizawlah tualthahna a thleng; V. Lalhmingthangi, Tuikual South thihnaa a mawhphurtu ni a rin man a ni tawh

March 17, 2024 : Tukin zing dar 10 vel khan Aizawl New Market-a a dawrah V. Lalhmingthangi (52) w/o C. Zothanmawia, Tuikual South chu chu thia chhar a ni.

Tuikual South a cheng thenkhatte sawi danin V. Lalhmingthangi hian haw tlai chang a nei thin a, heng hunahte hian an pa chuan a lo mutsan mai thin. Tukinah in lamah a haw loh avang leh phone hmanga biak tlang theih a nih loh avangin a chhungte an dawr lamah an kal a. Dawr hi pawn lamah a inkalh a, dawr kawngkhar bulah thisen an hmuh avangin dawr kalhna chhutchhiat a ni a, thisena baw nuai karah V. Lalhmingthangi hi thia hmuh a ni.

V. Lalhmingthangi hian dawr a khar hnuin thil lei duh nia insawiin a phone leh a, chuvangin dawr hi a hawng leh a ni.

Tualthihna chungchangah hian vawiin tlai khan Home Minister Pu K. Sapdanga chuan Chanchinbumite hmaah tualthattu ni a rin man a nih tawh thu a sawi.

Home Minister chuan tukin ni 17.3.2024 khan Pu Zothanmawia (64) Tuikual South veng chuan Aizawl Police Station-ah a nupui V. Lalhmingthangi, Aizawl New Market a VLH Variety Store neitu chu zana a rawn haw loh report siam a tum laiin, a fapa in a nu V. Lalhmingthangi ruang chu a dawr chhungah thi in an hmuh thu a hrilh tih a sawi a. Report dawn a nih velah Police leh Forensic team-te chu ruang awmna dawrah kal ngalin, ngawrh takin hnu chhui tan nghal a ni a. A hmuna thil awmdan leh he thil thleng chungchanga thu hriat nei awm angte statement atangin Police team hrang hrang insem darh chuan a titu ni ngei a rinhlelh Irene Lallawmzuali (34) w/o Lallungmuana, Ramthar North a cheng mek chu Zemabawk Dinthar venga a thiannu in atang man nghal a ni, tih a sawi.

Pu K. Sapdanga chuan 'kan mi rinhlelh man kut atang hian tualthahna atan a hman ni ngei a lang, chemte leh tualthita thil neih ni ngei a lang engemawzat man tel a ni bawk a. Kan mi rinhlelh in Police hmaa a thusawi atang chuan ama tih ngei ni in a lang, a ti.

V. Lalhmingthangi ruang hi postmortem fel tawh a ni a, hnu chhui tur tam tak la awmte pawh, a tahtawl a, uluk tak a chhui zui leh vek tur a ni. Thiltisualtu in thiamloh a chan ngei theih nan mipui ten theih tawpa Police-te hnuchuina min pui turin kan insawm a, hnuchuina tithuanawp thei tur thil ti lo turin kan in ngen a ni. Aizawl PS-ah Case No 87/24 Dt 17.03.2024 u/s 302/201/380 IPC siam a ni, tiin Home Minister chuan Chanchinbumite hmaah a sawi.